Ramdas Athawale : …ही उद्धव ठाकरे यांची मोठी चूक, ठाकरे बंधूंच्या युतीवर रामदास आठवले यांचं मोठं विधान

केंद्रीय राज्यमंत्री रामदास आठवलेंनी एक महत्त्वाचे विधान केले. उद्धव ठाकरे आणि राज ठाकरे एकत्र येणे ही उद्धव ठाकरेंची मोठी चूक असल्याचे आठवले म्हणाले. त्यांच्या मते, ठाकरे बंधूंच्या एकीमुळे महायुतीला मुंबईतील नॉन-मराठी मते मोठ्या प्रमाणात मिळतील. मुंबई शहरात 40% मराठी आणि 60% नॉन-मराठी मतदार असून, मराठी मतांमध्येही महायुतीला चांगला पाठिंबा मिळेल, असा आठवलेंचा दावा आहे. यामुळे उद्धव ठाकरेंचे मोठे नुकसान होईल आणि राज ठाकरेंना सोबत घेण्याची चूक त्यांना टाळायला हवी होती, असे आठवले म्हणाले.

दरम्यान, पुणे महापालिकेसाठी महायुती, ठाकरे बंधूंसह महाविकास आघाडीची मोर्चेबांधणी जोरात सुरू झाली आहे. भाजपकडून पुण्यात मोठे शक्तीप्रदर्शन केले जाणार असून, मुख्यमंत्र्यांच्या हस्ते 3 हजार कोटींच्या कामांचे उद्घाटन होणार आहे. भाजपकडून निवडणुकीची दिशा स्पष्ट केली जाईल. दुसरीकडे, पुणे महापालिकेसाठी महाविकास आघाडीची एकत्र बैठक आयोजित करण्यात आली आहे आणि उद्धव ठाकरे 19 तारखेला पुणे दौऱ्यावर असणार आहेत. राज ठाकरे यांच्याकडूनही आढावा घेतला जात असून, पुण्यात मनसे आणि ठाकरेंची शिवसेना एकत्र येणार का, याची चाचपणी सुरू आहे. महानगरपालिका निवडणुका कधीही जाहीर होऊ शकतात आणि भाजपने जोरदार तयारी सुरू केली आहे.