LPG Price Today: भर उन्हाळ्यात गॅस दरवाढीचा भडका? इतक्या रुपयांनी महागणार घरगुती सिलेंडर, त्या दाव्याने एकच खळबळ
Domestic Cylinder Price: गेल्या महिन्यात 60 रुपयांनी घरगुती गॅस दरवाढ झाली. तर आता व्यावसायिक गॅस दरवाढीचा स्फोट झाला आहे. एकाच दमात 993 रुपयांनी व्यावसायिक सिलेंडर महागले. आता घरगुती सिलेंडर वाढ होण्याचा दावा करण्यात येत आहे.
LPG Price Today: गेल्या 15 वर्षात घरगुती गॅसच्या किंमती दुप्पटीहून अधिकने महागल्या आहेत. आता पुन्हा गॅस दरवाढीचे चटके ग्राहकांना सहन करावे लागू शकतात. गेल्या महिन्यात 60 रुपयांनी दरवाढ झाली. आता पुन्हा दरवाढीचा बॉम्ब पडण्याची शक्यता वर्तवली जात आहे. व्यावसायिक गॅस दरवाढीचा स्फोट झाला आहे. एकाच दमात सरकारने 993 रुपयांनी गॅस दरवाढ केली आहे. आता घरगुती गॅस दरवाढीचा नंबर असल्याचे समजते. 1 मे रोजी देशभरात कमर्शियल सिलेंडरचा भडका उडाल्याने हॉटेलिंग महागले आहे.
घरगुती गॅसची किती दरवाढ?
सूत्रांच्या माहितीआधारे एबीपी न्यूजने याविषयीचे वृत्त दिले आहे. त्यानुसार घरगुती एलपीजी सिलेंडरची किंमत 40 ते 50 रुपये प्रति सिलेंडरपर्यंत वाढ होण्याची शक्यता आहे. अगोदरच सिलेंडरच्या किंमती सर्वसामान्यांच्या अवाक्या बाहेर झाल्या आहेत. 500 रुपयांच्या आत मिळणारे सिलेंडर आता थेट 1000 रुपयांच्या जवळपास आहे. त्यात अजून भर पडल्यास किचन बजेट कोलमडेल. अनेकांना चुलीचा आधार घ्यावा लागेल. शहरातील फ्लॅटमध्येही चूल पेटवावी लागणार का? असा संतप्त सवाल गृहिणी विचारत आहेत. येत्या आठवड्यात नवीन दरवाढ लागू होण्याची शक्यता वर्तवली जात आहे.
व्यावसायिक नंतर घरगुती गॅसचा क्रमांक
जागतिक बाजारात कच्चा तेलाच्या किंमतीत सातत्याने चढउतार होत आहे. त्याचा थेट परिणाम स्थानिक इंधन किंमतीवर अजून पडलेला नाही. सरकारने अनेक कर आणि उपकर कमी केल्याने थेट महागाईची झळ बसली नाही. पण आता जागतिक बाजारात किंमती वधारल्याने पेट्रोल-डिझेलही महागण्याची भीती व्यक्त होत आहे. पेट्रोलियम मंत्र्यांनी ट्वीट करत दरवाढीचे दावे फेटाळले आहेत. पण काही दाव्यानुसार व्यावसायिक गॅस सिलेंडरनंतर घरगुती गॅसची किंमत कधीही वाढू शकते.
व्यावसायिक सिलेंडरचा भडका
व्यावसायिक गॅस सिलेंडरचा 1 मे रोजी भडका उडाला. एकाच झटक्यात 993 रुपयांनी किंमती भडकल्या. त्यामुळे सर्वसामान्यांना हॉटेलचाही चेहरा पाहता येणार नाही. तर बाहेरगावी राहणाऱ्या नोकरदारांची खानावळ आणि हॉटेलिंगचा खर्च वाढणार आहे. त्यामुळे बड्या शहरात काम करणाऱ्यांना मोठा संकटाचा सामना करावा लागणार आहे. तर पोलीस भरती, विविध परीक्षा, शाळा, महाविद्यालयं आणि विविध कोर्स करण्यासाठी बाहेर गावी शिकणाऱ्या विद्यार्थ्यांचा, नोकरदारांचा खर्च वाढणार आहे.
