गोळीचा आवाज ऐकू आला म्हणून शेजारी धावले, समोरील दृश्य पाहून त्यांना धक्काच बसला, काय घडले नक्की?

मुंगेर : बिहारमधील मुंगेर जिल्ह्यात एक धक्कादायक घटना उघडकीस आली आहे. पती-पत्नीमध्ये झालेल्या वादातून पतीने पत्नीवर गोळी झाडल्याची घटना उघडकीस आली आहे. मुंगेर जिल्ह्यातील तारापूर पोलीस ठाण्याच्या हद्दीतील खुडिया गावात ही घटना घडली. या गोळीबारात पत्नी गंभीर जखमी झाली असून, तिच्यावर रुग्णालयात उपचार सुरु आहेत. घटनेनंतर पती फरार झाला आहे. घटनेची माहिती मिळताच तारापूर पोलीस घटनास्थळी दाखल झाले. पोलिसांनी शेजाऱ्यांच्या मदतीने महिलेला अनुमंडल रुग्णालयात दाखल केले. तेथे प्राथमिक उपचार करुन महिलेला भागलपूर येथे रेफर करण्यात आले आहे. पोलीस फरार पतीचा शोध घेत आहेत.

दारुच्या नशेत पती नेहमी पत्नीला मारहाण करायचा

पती मलिक यादव आणि पत्नी प्रियांका देवी हे खुडिया गावात राहत होते. दोघा पती-पत्नीमध्ये नेहमी कोणत्या ना कोणत्या कारणावरून वाद होत होते. महिलेच्या नातेवाईकांनी दिलेल्या माहितीनुसार, मलिक यादव याला दारूचे व्यसन होते आणि दररोज पत्नीशी भांडण करायचा. रविवारी बाहेरुन आला आणि त्याने पत्नीकडे जेवण मागितले. जेवणादरम्यान पत्नीसोबत काही कारणातून त्याचा वाद झाला. वादातून त्याने प्रियांकाला बेदम मारहाण केली. मग पिस्तूल काढून पत्नीवर गोळीबार केला आणि घटनास्थळावरून पळ काढला.

गोळीचा आवाज ऐकून शेजारी धावले

गोळीचा आवाज ऐकून शेजारी मलिकच्या घरी धावले. घरी जाऊन पाहिले प्रियांका रक्ताच्या थारोळ्यात जमिनीवर पडली होती. शेजाऱ्यांनी तात्काळ पोलिसांना माहिती दिली. पोलिसांच्या मदतीने महिलेला रुग्णालयात नेले. आरोपी पतीच्या अटकेसाठी पोलीस छापेमारी टाकत आहेत. पीडित महिलेच्या नातेवाईकांच्या जबाबावरून एफआयआर दाखल करण्यात आला आहे. पोलीस या प्रकरणाचा तपास करत आहेत. दोषीवर कडक कारवाई केली जाईल, तारापूरचे डीएसपी पंकज कुमार यांनी सांगितले.