दुभाजक तोडून ट्रकची कारला धडक, एकाचा मृत्यू, महिला पोलिसाच्या पतीसह दोघे जखमी
कारमध्ये अडकलेल्या दोघा गंभीर जखमी तरुणांना बाहेर काढून रुग्णालयात पाठवण्यात आले. जखमी गिरीश माने हे सहाय्यक पोलीस निरीक्षक हर्षा कांबळे-माने यांची पती आहेत. ते रिपाइं आठवले गटाचे कार्यकर्तेही आहेत.
सोलापूर : सांगोला येथून सोलापूरकडे येणार्या कारला भरधाव ट्रकने धडक दिली. या घटनेत कारमधील तरुणाचा मृत्यू झाला आहे. ही घटना सोलापूर-मंगळवेढा महामार्गावरील बेगमपूर गावाजवळील स्टेट बँकेसमोर रात्री एक वाजताच्या सुमारास घडली. या घटनेत दोघे गंभीर जखमी झाले आहेत.
अपघातात एपीआयचे पती जखमी
सुनील बनसिद्ध वाघमारे (वय 31, रा. टिळकनगर, मजरेवाडी, सोलापूर) असे अपघातातील मृत तरुणाचे नाव आहे. गिरीश ब्रम्हदेव माने (रा. अरविंद धाम, पोलीस वसाहत, सोलापूर) आणि हर्षवर्धन मलिक सर्वगोड (वय 35, रा. गजाजन नगर, मजरेवाडी, सोलापूर ) अशी अपघातातील जखमींची नावे आहेत. यातील जखमी गिरीश हे सहाय्यक पोलीस निरीक्षक हर्षा कांबळे-माने यांची पती आहेत. गिरीश माने हे रिपाई आठवले गटाचे कार्यकर्ते आहेत.
कारचा दरवाजा गॅस कटरने कापला
या अपघाताची माहिती कळताच कामती पोलीस आणि गावातील ग्रामसुरक्षा दलातील युवकांनी तत्काळ घटनास्थळी धाव घेतली. कारमध्ये अडकलेल्या दोघा गंभीर जखमी असलेल्या गिरीश आणि हर्षवर्धन या तरुणांना बाहेर काढून तत्काळ सोलापूर येथील खासगी रुग्णालयात उपचारासाठी पाठवून देण्यात आले. तर जागीच मृत्यू झालेल्या सुनील यास कारचा दरवाजा गॅस कटरने कापून बाहेर काढले.
नेमकं काय घडलं?
गिरीश माने आणि त्यांचा मित्र हे सोलापूरहून एका खासगी कामानिमित्त (एमएच 13 डीटी 1891) या कारमधून सांगोला येथे गेले होते. काम संपवून ते रात्री उशिरा परत सोलापूरला निघाले होते. दरम्यान सोलापूरहून मंगळवेढ्याच्या दिशेने सिमेंट घेऊन भरधाव वेगाने व चुकीच्या दिशेने निघालेल्या ट्रकने (एमएच 13 डी क्यू1270) महामार्गावरील बेगमपूर येथील स्टेट बँकेसमोर कारला समोरून जोरदार धडक दिली. यामुळे कारमधील चालकाशेजारी बसलेल्या सुनील वाघमारे याचा जागीच मृत्यू झाला.
गिरीश आणि हर्षवर्धन या दोघांच्या हात, पाय व डोक्याला जबर मार लागला आहे. चालकाचा वाहनावरील ताबा सुटल्याने महामार्गावरील दुभाजक तोडून ट्रकने कारला समोरून जोरदार धडक दिली. सोलापूरकडे निघालेली कार उलट दिशेला काही अंतर फरफटत गेली. घटनास्थळापासून सुमारे दोनशे मीटर अंतरावर ट्रक थांबला. घटनेनंतर ट्रक चालकाने तत्काळ पलायन केले.
मध्यरात्री ग्रामसुरक्षा दल अपघातग्रस्तांच्या मदतीला
दरम्यान घटनेनंतर कांही वेळातच कामती पोलीस घटनास्थळी पोचले. मध्यरात्रीनंतरची वेळ असूनही महामार्गावर घडलेल्या या अपघाताच्या मदतीसाठी गावातील ग्रामसुरक्षा दलातील लखन ताकमोगे, अमर गोडसे, संजय चव्हाण, पपूल शेख, गजानन गुंडाळे या युवकांनी घटनास्थळी धाव घेतली.
संबंधित बातम्या :
PHOTO | औरंगाबादमध्ये महामार्गावर बस उलटली, जखमी प्रवाशांना सोडून ड्रायव्हरचा पळ
कारच्या धडकेनंतर बाईक 60 फूट उंच हवेत उडाली, महिलेचा जागीच मृत्यू, औरंगाबादेत अपघाताचा थरार
CCTV VIDEO | अस्थी विसर्जनानंतर परतणाऱ्या कुटुंबाला अपघात, टेम्पोला अर्टिगाची जोरदार धडक
