Breaking | भरधाव ट्रकची अ‍ॅपे रिक्षाला धडक, 5 जणांचा मृत्यू, 6 गंभीर जखमी, कुठे घडली घटना?

Image Credit source: tv9 marathi

राजीव गिरी, नांदेड: राज्यभरात रामनवमीचा उत्साह असतानाच नांदेडमधून एक भीषण घटना समोर आली आहे. भरधाव येणाऱ्या ट्रक आणि अ‍ॅपे रिक्षाची धडक झाली. या अपघातात अ‍ॅपे रिक्षाचा चक्काचूर झाला. गंभीर बाब म्हणजे अपघातात चार जण जागीच ठार झाले. तर आणखी एक जण उपचारादरम्यान मृत्यूमुखी पडला. या घटनेतील अन्य जखमींना उपचारासाठी रुग्णालयात दाखल करण्यात आलंय.

कुठे घडली घटना?

नांदेड ते मुदखेड मार्गावरील इजळी पाटी जवळ आज सकाळीच हा अपघात झाला आहे. सिमेंटने भरलेल्या ट्रकने ॲपे ऑटोरिक्षाला धडक दिली. या अपघातात 5 जणांचा मृत्यू झालाय. यात एका लहान मुलाचा आणि एका वृद्ध व्यक्तीचा समावेश आहे.मुदखेडकडून नांदेडकडे येणाऱ्या ॲपे ऑटोला ट्रकने धडक दिली.या ॲपे ऑटोमध्ये जवळपास 15 प्रवाशी होते. हे सर्व जण वाजेगाव येथे मजुरी साठी जात होते. नांदेड कडून भरधाव येणाऱ्या सिमेंटने भरलेल्या ट्रकने या ऑटोला जोराची धडक दिली.
या अपघातात 4 जणांचा जागीच तर एका महिलेचा उपचारादरम्यान मृत्यू झाला. 6 जण गंभीर जखमी झाले असून जखमींवर नांदेडच्या शासकीय रुग्णालयात उपचार सुरु आहेत.

मृतांची नावे

मुगट जवळ अपघात मृत्यू झालेल्या व्यक्तींची नावं पुढील प्रमाणे-

• सरोजा रमेश भोई वय वर्षे ४० रा. मेहकर बुलडाणा
• गाली कल्याण भोई वय वर्षे २४ रा गेवराई बिड
• जोयल कल्याण भोई वय वर्षे ७ महीने
• जेष्ठ नागरिक वय ७०- यांची आणि अन्य एका व्यक्तीची ओळख अद्याप पटली नाही

लातूरात रविवारी भीषण अपघात

अन्य एका घटनेत लातूर जिल्ह्यातल्या औसा-निलंगा रस्त्यावरच्या चलबुर्गा पाटी जवळ कार उलटल्याने रविवारी चौघांचा दुर्दैवी मृत्यू झाला. पुणे येथून लग्न सभारंभ आटोपून सचिन बडूरकर आणि त्यांचे कुटुंबीय निलंग्याकडे परतत होते . त्यांची कार औसा तालुक्यातल्या चलबुर्गा पाटी जवळ आल्यानंतर चालकाचा ताबा सुटल्याने भरधाव वेगात कार रस्त्याखाली जाऊन उलटली. या भीषण अपघातात एकाच कुटूंबातील चौघांचा घटनास्थळीच मृत्य झाला. दोघे जण गंभीररीत्या जखमी केले.
या अपघातात निलंगा येथील व्यवसायिक सचिन बडूरकर यांची दोन मुले अमर बडूरकर ( वय-१४) व जय बडूरकर ( वय-१०), पुतण्या अंश बडूरकर ( वय-१०) मेव्हणा प्रकाश कांबळे ( वय -२७) या चौघांचा दुर्दैवी मृत्यू झाला आहे . तर इतर दोघे जण जखमी झाले.