अभिजीत पोते, TV9 मराठी, पुणे : सोशल मीडियावर तरुणीसोबत झालेली ओळख एका तरुणाला महागात पडले आहे. सोशल मीडियातील ओळखीमुळे तरुणाला आपला जीव गमावण्याची वेळ आली आहे. पुण्यात घडलेल्या या घटनेने एकच खळबळ उडाली आहे. ऑनलाइन ओळख झालेल्या तरुणीने तरुणाचा आक्षेपार्ह व्हिडिओ (Offensive video) सोशल मीडियावर अपलोड करण्याची धमकी (Threat to video upload on social media) देत सातत्याने खंडणीची मागणी केल्याने तरुणाने आत्महत्या (Youth Suicide) केल्याचे उघडकीस आले आहे.
मयत 25 वर्षीय तरुण पुण्यातील धनकवाडीत राहतो. तरुणीकडून वारंवरा होत असलेल्या पैशाच्या मागणीला कंटाळून तरुणाने अखेर टोकाचा निर्णय घेत स्वतःचे जीवन संपवले. या प्रकरणी एका तरुणीच्या विरोधात आत्महत्येस प्रवृत्त करणे तसेच माहिती-तंत्रज्ञान कायद्यान्वये सहकारनगर पोलिसांनी गुन्हा दाखल केला आहे.
पोलिसांनी दिलेल्या माहितीनुसार, तरुणाची काही महिन्यांपूर्वी सोशल नेटवर्किंग साइटवर एका अनोळखी तरुणीशी ओळख झाली होती. यानंतर दोघांमधील संवाद वाढला. त्यानंतर तरुणीने त्याच्याकडे पैशांची मागणी केली.
पैसे न दिल्यास आक्षेपार्ह व्हिडिओ सोशल मीडियावर अपलोड करण्याची धमकी तिने तरुणाला दिली. त्यानंतर तरुणाने तिला ऑनलाइन पद्धतीने साडेचार हजार रुपये पाठविले होते. त्यानंतरही तरुणी त्याला धमकावत होती.
अखेर तरुणाने तिला संदेश पाठविला की, ‘मैं सुसाईड करा रहा हूँ’. त्यावर तिने ‘करो सुसाईड, मैं सोशल मीडियापर व्हिडिओ व्हायरल कर रही हूँ’, अशी धमकी देऊन पैशांची मागणी केली.
तरुणीच्या धमकीमुळे तरुणाने राहत्या घरात आत्महत्या केली, अशी फिर्याद तरुणाच्या भावाने सहकारनगर पोलीस ठाण्यात दिली आहे. गुन्हे शाखेचे पोलीस निरीक्षक प्रकाश पासलकर या गुन्ह्याचा तपास करीत आहेत.