टीएमसी खासदाराच्या घराच्या रेकीचं मुंबई कनेक्शन, माहिममध्ये पोलिसांची झाडाझडती; 26/11 हल्ल्याचं कनेक्शन काय ?

तृणमूल काँग्रेस पक्षाचे खासदार अभिषेक बॅनर्जी यांच्या घराची रेकी करणाऱ्याला मुंबईतून अटक करण्यात आली आहे. मुंबईतील माहिम येथून राजाराम रेगे या व्यक्तीला ताब्यात घेण्यात आलं आहे. माहिममध्ये कोलकाता पोलिसांनी ही कारवाई केल्याचं समजतयं. मुंबईसह संपूर्ण देशाला हादररवणाऱ्या 26/11 च्या दहशतवादी हल्ल्याच्यावेळीस देखील राजाराम रेगे याचं नाव समोर आलं होतं. डेव्हिड हेडलीच्या संपर्कात असल्याने राजाराम रेगे याची तेव्हा चौकशी करण्यात आली होती.

सोमवारी कोलकाता पोलिसांचं एक पथक मुंबईत दाखल झालं आणि माहिम मधून राजाराम रेगेला त्यांनी अटक केली. टीएमसीचे नेते अभिषेक बॅनर्जी यांच्या घराची रेकी केल्याचा आरोप रेगे याच्यावर आहे. काही काळ तो कोलकातामध्ये तळ ठोकून होता. अभिषेक बॅनर्जी आणि त्यांच्या पीएचा फोन नंबरही त्याने मिळवला होता. रेगे याच्याकडून मोठ्या योजनेचं प्लानिंग सुरू होतं असं कोलकात पोलिसांचं म्हणणं आहे.

26/11 चा आरोपी डेव्हिड हेडली आणि राजाराम रेगे, कनेक्शन काय ?

मुंबईत 26/11 रोजी झालेल्या दहशतवादी हल्ला संपूर्ण देशाला हादरवून गेला. या हल्ल्यापूर्वी डेव्हिड हेडली मुंबईत आला होता, आणि त्याने मुंबईतील काही ठिकाणांची रेकी केली होती. त्यावेळेस तो राजाराम रेगे याला भेटला होता. हेडलीने शिकागो न्यायालयात खटल्यात फिर्यादी साक्षीदार म्हणून साक्ष दिली होती. मध्य मुंबईतील दादर येथील शिवसेना भवनात जाऊन रेगे याची भेट घेतल्याचे हेडलीने सांगितले होते. त्यावेळी हल्ल्याच्या तपासादरम्यान पोलिसांनी राजाराम रेगेची चौकशी केली होती.

आता याच राजाराम रेगेचं नाव पुन्हा समोर आलं आहे. तो कोलकात्यामध्ये एका हॉटेलमध्ये बराच काळ रहता होता. तेथे वास्तव्य करून तो मोठ्या घातपाताची योजना आखत होता. त्याने टीएमसी खासदार बॅनर्जी आणि त्यांच्या पीएचा नंबरही मिळवला. तसेच तो काही लोकांच्या संपर्कात होता, अशी माहिती कोलकाता पोलिसांनी दिली आहे. त्यामुळे पोलिसांनी त्याच्याविरोधात गुन्हा दाखल करून त्याला माहिम येथून अटक केली. त्यामुळे राजाराम रेगे नक्की कुठलं षडयंत्र रचत होता, त्याचं काय प्लानिंग काय होत याची माहिती लवकरच तपासत उघड होईल, त्याकडे सर्वांचं लक्ष लागलं आहे.