Royal Enfield Fire : तुमच्याकडे बुलेट असेल तर तुम्ही ही बातमी बघाच! आधी इंजिनमधून धूर आणि मग जाळ

अचानक पेटली बुलेट

Image Credit source: TV9 Marathi

उल्हासनगर : एकीकडे इलेक्ट्रीक दुचाक्यांना (Ola Electric Bike) आग लागण्याच्या घटना सातत्यानं समोर येत आहेत. त्यामुळे लोक धास्तावले आहेत. पण फक्त इलेक्ट्रीक कारच नव्हे, तर कार आणि दुचाक्यांनाही कोणत्याही क्षणी आग लागू शकते. उल्हासनगरमधील (Ulhasnagar) घटनेनं ही बाब अधोरेखित केली आहे. रॉयल इनफिल्डवरुन (Royal Enfield) जाणारा एक दुचाकीस्वार त्याच्या बुलेटला आग लागल्यामुळे चांगला घाबरलाय. इतका की त्यानं बाईकच जागच्या जागी सोडून दिली आणि पळ काढला. आधी या बाईकमधून धूर येत असल्याचं दिसून आलं. धूर येताना दिसतोय म्हणून एक इसम या माणसाला सांगायला आला. इंजिनमधून धूर येत असल्याची पुसटशीही कल्पना या बुलेटस्वार व्यक्तीला नव्हती. धूर येत असल्याचं कळताच, या बुलेटस्वारानं बाईकच जागच्या जागी सोडून दिली. त्यानंतर बघता बघता बुलेटनं पेट घेतला. ही संपूर्ण घटना सीसीटीव्ही कॅमेऱ्यात कैद झाली.

काय दिसलं सीसीटीव्हीमध्ये?

उल्हासनगरच्या कॅम्प 4 मधील समता नगरमध्ये हा प्रकार घडला. शेजारीच लागलेल्या एका सीसीटीव्ही कॅमेऱ्यात दुचाकीला आग लागण्याचा थराराक प्रकार कैद झाला. राजेश गुप्ता समता नगरमध्ये राहायला आहेत. शनिवारी दुपारी राजेश गुप्ता हे यांच्या बुलेट मोटरसायकलवर बसले होते. अचानक बुलेटमधून धूर येऊ लागला. त्यामुळे गुप्ता यांनी गाडी तशीच सोडली आणि बाजूला झाले.

वेळीच बुलेटवरुन उतरल्यामुळे राजेश गुप्ता यांचा जीव थोडक्यात वाचलाय. कारण गाडी सोडताच बुलेटमधून त्यानंतर काही क्षणातच त्यांच्या गाडीने पेट घेतला. यावेळी आजूबाजूच्या लोकांनी पाणी, रेती, माती, फायर एक्सटिंग्विशरच्या साहाय्याने ही आग विझवण्याचा प्रयत्न केला. मात्र शेवटपर्यंत ही आग विझली नाही. त्यामुळे संपूर्ण गाडी जळून खाक झाली. यात राजेश गुप्ता यांचं मोठं आर्थिक नुकसान झालंय. पण सुदैवाने यात कुणालाही इजा झालेली नाही.

का लागली आग?

सध्या तापमानात मोठी वाढ झालेली आहे. अनेक ठिकाणी गाड्या पेट घेण्याच्या घटना समोर आलेल्यात. वाढलेल्या तापमानात अनेकदा गाडी गरम होऊन पेट घेण्याच्या प्रकार नोंदवले गेलेत आहेत. वाढलेल्या पाऱ्यामुळेच दुचाकीला आग लागल्याची घटना उल्हासनगरमध्ये घडली असावी, अशी शंका घेतील आहे.

पाहा या संपूर्ण घटनेचं थरारक सीसीटीव्ही :