गणेश सोळंकी, बुलढाणा : शेगाव (Shegaon) येथून यवतमाळ (yavatmal) येथे जात असताना शेगाव आगाराच्या बस चालकाला साईट देण्याच्या कारणावरून खामगाव (khamgaon) येथील स्वामी ट्रॅव्हल्सच्या खाजगी बस चालकाने बेदम मारहाण केल्याची घटना शेगाव बाळापुर दरम्यान घडली आहे. खाजगी बस चालकाने एसटी बस चालकाला इतकी मारहाण केली, की एसटी बस चालकाचा एका डोळ्याला आणि मेंदूला मार लागलेला आहे. त्यामुळे गंभीर जखमी एसटी बस चालकाला अकोला येथील शासकीय रुग्णालयात दाखल करण्यात आलेल आहे. या प्रकरणी बाळापूर पोलिसांनी लक्झरी बस चालकावर व वाहकावर विविध कलमान्वये गुन्हे दाखल केलेले आहे.
एप्रिल आणि मे महिन्यात सुट्टीमुळं अनेकजण गावाकडं जात असतात, सध्या एसटी आणि ट्रॅव्हल्स गाडीला अधिक गर्दी असल्याचं पाहायला मिळतं आहे. लोकांना रोज गावाला सोडणं आणि घेऊन जाण्याचं काम दोन्ही गाड्या करत आहेत. एसटीचे दर कमी असल्यामुळे लोकांचा अधिक एसटीकडे कल असतो. त्यामुळे अनेकदा लक्झरी चालक मुद्दाम भांडण काढतात असं पाहायला मिळालं आहे. काल जो प्रकार झालाय, तो सुध्दा त्यातून झाला असावा अशी सगळीकडं चर्चा आहे.
गाड्या मोठ्या असल्यामुळे एकमेकाला साईट देण्याच्या कारणावरुन भांडणं सुरु झालं. एसटी चालकाला लक्झरी चालकाने बेदम मारहाण केली. एसटी चालकाच्या डोळ्याला आणि मेंदूला जबर मारहाण झाल्यामुळे अकोला येथील शासकीय रुग्णालयात त्यांना दाखल केलं आहे. पोलिसांनी लक्झरी चालक आणि मालक यांच्यावर गुन्हा दाखल केला आहे. लवकरचं त्यांची कसून चौकशी करण्यात येणार आहे.