सोन्याच्या भावात मिळणाऱ्या लाकडाची ‘अशी’ व्हायची तस्करी, वनविभागाच्या कारवाईने ‘पुष्पा’ चा झाला भांडाफोड

Image Credit source: Google

जितेंद्र बैसाणे, टीव्ही 9 मराठी, नंदुरबार : सोन्याच्या भावात विकलं जाणारं लाकूड म्हणजे सागवान झाडाचं लाकूड. फर्निचर बनविण्यासाठी आणि महागडे लाकूड म्हणून सागवानची ओळख आहे. मोठी मागणी सागवानच्या लाकडाला असते. त्यामुळे सागवान लाकडाची तस्करी होण्याचे प्रमाण हळूहळू वाढतच चाललं आहे. यामध्ये महाराष्ट्र आणि गुजरात सीमेवर मोठ्या प्रमाणात वनक्षेत्र आहे. त्यामध्ये दोन्ही राज्याच्या सीमा भागाचा फायदा उचलत काही तस्कर जंगलातील महागड्या सागवान झाडांची तस्करी करत आहे. पुष्पा चित्रपटाला साजेशी तस्करी येथील जंगलात सुरू आहे. दिवसेंदिवस जंगलातील सागवान, खैर अशा झाडांची झालेली संख्या पाहून वनविभागाने कारवाई सुरू केली आहे. यामध्ये मिळालेल्या माहितीनुसार तस्करांवर कारवाई केली जात आहे. अशीच एक मोठी कारवाई वनविभागाने केली आहे. यामध्ये थेट लाकूडचं जमिनीत पुरून ठेवल्याचे समोर आले आहे. त्यासाठी चक्क जेसीबीच्या सहाय्याने जमिनीत लपून ठेवलेले लाकूड बाहेर काढण्यात आले आहे.

फर्निचर बनवण्यासाठी आणि इतर कामांसाठी सागवान लाकूड मौल्यवान समजले जाते सागवान लाकडाला बाजारपेठेत मोठी मागणी असल्याने नवापूर तालुक्यातील वनक्षेत्रात मोठ्या प्रमाणात लाकडांची बेकायदेशीर तोड होत असते.

लाकूड तस्कर गुजरात आणि महाराष्ट्र सीमा वरती भागात मोठ्या प्रमाणात लाकडांची तस्करी करत असल्याने वन विभागाने कारवाईचा धडाका सुरू केला आहे. त्यामुळे नवनवीन युक्त्या समोर येत आहेत.

महागड्या गाड्यांमधून होणारी तस्करी उघडकीस आली होतीतर वन तस्करांनी कमालच केली आहे. तस्करी केलेले सागवानी लाकूड जमिनीत पुरून ठेवले होते.

वन विभागाच्या अधिकाऱ्यांनी मिळालेल्या माहितीनुसार परिसरात तपासणी केली असता जमिनीत पुरून ठेवलेला मोठा लाकूड साठा हाती लागला आहे.

लाकडांची साईज मोठी असल्याने जमिनीत पुरून ठेवलेल्या लाकूड साठा बाहेर काढण्यासाठी वन विभागाच्या अधिकाऱ्यांना जेसीबी ची मदत घ्यावी लागली आहे.

वन विभागाच्या कारवाईच्या धडाक्याने तस्करांचे धाबे दणाणले आहे नवापूर वन विभागाच्या अधिकारी स्नेहल अवसलमल आणि त्यांच्या पथकाने ही मोठी कारवाई केली आहे.