पहिल्याच चित्रपटातून रातोरात बनली स्टार, पण अचानक झाली गायब.. आता चालवते बेकरी; या अभिनेत्रीला ओळखलं का ?

बॉलिवूडमध्ये असे अनेक कलाकार आहेत, ज्यांनी आपल्या पहिल्याच चित्रपटातून प्रेक्षकांच्या मनावर अक्षरशः राज्य केले. रातोरात प्रसिद्धी, चाहत्यांची गर्दी आणि स्टारडम मिळाले… पण त्यानंतर मात्र त्यांच्या करिअरला अपेक्षित उंची गाठता आली नाही. अशा कलाकारांना वन फिल्म वंडर म्हटले जाते. या यादीत राहुल रॉय, भाग्यश्री, भूमिका चावला, ग्रेसी सिंह यांच्यासोबतच एक नाव आवर्जून घेतले जाते ते म्हणजे संदली सिन्हा. आज संदली सिन्हाची चर्चा होण्याचे कारण म्हणजे तिचा सुपरहिट चित्रपट तुम बिन. या चित्रपटाला 25 वर्षे पूर्ण झाली. 2001 साली आलेल्या या रोमँटिक चित्रपटाने बॉक्स ऑफिसवर चांगली कमाई तर केलीच, पण संदलीच्या निरागस चेहऱ्याने आणि गोड हास्याने लाखो चाहत्यांना भुरळ घातली होती.

तुम बिनमध्ये संदलीने ‘पिया’ नावाच्या साध्या, निरागस मुलीची भूमिका साकारली होती. तिचा अभिनय, तिचा लूक आणि तिच्या चेहऱ्यावरचा गोडवा प्रेक्षकांना खूप आवडला. चित्रपट रिलीज होताच संदली रातोरात स्टार बनली. प्रत्येकाच्या तोंडी तिचंच नाव होतं. पण या जबरदस्त सुरुवातीनंतर तिचे फिल्मी करिअर मात्र अपेक्षेप्रमाणे पुढे जाऊ शकले नाही.

कोण आहे संदली सिन्हा?

संदलीचा जन्म एका अशा कुटुंबात झाला, जिथे देशसेवा आणि शिक्षणाला खूप महत्त्व होते. तिचे वडील भारतीय सैन्यात होते आणि देशासाठी सेवा बजावताना शहीद झाले. त्यानंतर तिच्या आईने दिल्लीत संदली आणि तिच्या दोन भावंडांचा सांभाळ केला. संदलीने दिल्लीतील एअर फोर्स बाल भारती स्कूलमध्ये शिक्षण घेतले आणि जीझस अँड मेरी कॉलेजमधून पदवी पूर्ण केली. सुरुवातीला तिला डॉक्टर बनायचे होते, कारण तिच्या कुटुंबात डॉक्टर आणि पायलट होते. पण एका फॅशन शोने तिच्या आयुष्याला वेगळे वळण दिले आणि ती ग्लॅमरच्या दुनियेकडे वळली.

सोनू निगमच्या आल्बममध्येही झळकली होती अभिनेत्री

कॉमर्समध्ये पदवी घेतल्यानंतर संदली करिअर करण्यासाठी मुंबईत आली. मॉडेलिंगपासून तिने सुरुवात केली आणि लवकरच तिची ओळख निर्माण झाली. सोनू निगमच्या दीवाना या लोकप्रिय म्युझिक व्हिडिओमधून तिला पहिली मोठी ओळख मिळाली. विशेष म्हणजे या व्हिडिओचे दिग्दर्शन करणारे अनुभव सिन्हा पुढे तिच्या पहिल्या चित्रपटाचे म्हणजेच तुम बिनचे दिग्दर्शक ठरले.

अनेक चित्रपटांत केलं काम

तुम बिनच्या यशानंतर संदलीकडे चित्रपटांच्या ऑफर्सचा पाऊस पडला. ती पिंजर, ओम आणि अब तुम्हारे हवाले वतन साथियो यांसारख्या चित्रपटांमध्ये दिसली. मात्र, पहिल्या चित्रपटासारखी जादू पुन्हा निर्माण होऊ शकली नाही. तिला मुख्य भूमिकांऐवजी सहाय्यक भूमिका मिळू लागल्या आणि हळूहळू ती चित्रपटांपासून दूर गेली.

ग्लॅमरच्या दुनियेपासून दूर, संदली आता काय करते ?

2005 मध्ये संदली सिन्हाने उद्योगपती किरण सालस्कर यांच्याशी लग्न केले. या दोघांना दोन मुलं आहेत. 2016 साली रिलीज झालेल्या तुम बिन 2मध्ये संदली ती छोट्याशा विशेष भूमिकेत दिसली होती. आज संदली सिन्हा मोठ्या पडद्यापासून दूर असली तरी तिची ओळख अजूनही तुम बिनमधील त्या गोड आणि निरागस ‘पिया’मुळेच कायम आहे. माहितीनुसार, आता ती बेकरी चालवते तसेच स्पा व्यवसाय सांभाळते. जरी तिचे बॉलिवूड करिअर फार काळ टिकले नाही, तरी एका चित्रपटातून मिळालेली लोकप्रियता आजही तिच्या चाहत्यांच्या मनात जिवंत आहे.