नवरात्रीच्या पहिल्याच दिवशी राजपाल यादवची डोळ्यात अंजन घालणारी पोस्ट, तीन मुलींचा बाप म्हणून मनातलं सांगितलं, सगळ्यांचीच बोलती बंद

प्रसिद्ध बॉलिवूड अभिनेता आणि कॉमेडिअन राजपाल यादव याने एक पोस्ट शेअर केली आहे. नवरात्रीनिमित्ताने त्याने शेअर केलेल्या या पोस्टमध्य त्याने सगळ्यांना विनंती केली की, ज्या मनोभावे आपण सगळे दुर्गामातेची पूजा करतो. त्याचप्रमाणे आपण देशातल्या महिलांच्या सुरक्षेसाठीही तत्पर राहायला पाहिजे. ही जबाबदारी आपलीच आहे. राजपाल यादवने पुढे सांगितलं की, देशाच्या प्रत्येक मुलीला कोणालाही न घाबरता आपले स्वप्न पूर्ण करण्याचा संपूर्ण अधिकार आहे. जसं हवं तसं जीवन जगण्याचा अधिकार त्यांनाही मिळाला पाहिजे. इन्स्टाग्रामवरील या पोस्टमध्ये राजपालने त्याच्या मनातील विचार परखडपणे मांडले आहेत. देवीच्या आगमनाच्यानिमित्ताने कन्या पूजन परंपरेचा उल्लेख करताना राजपालने प्रश्न उपस्थित केला की, लहान मुलींना देवीचे रुप मानले जाते, त्यांची पूजा केली जाते, पण खरंच त्या मुली प्रत्यक्षात सुरक्षित आहेत का?

राजपालची नेमकी पोस्ट काय?

“नवरात्रीच्या नऊ दिवसांत आपण देवी शक्तीची पूजा करतो. आठव्या आणि नवव्या दिवशी आपण लहान मुलींना देवी मानून त्यांची पूजा करतो आणि त्यांचे आशीर्वाद घेतो. पण जेव्हा महिलांच्या सुरक्षेशी संबंधित घटना उघडकीस येतात, तेव्हा हा प्रश्न उपस्थित होतो: ज्या देशात लहान मुलींना देवी मानले जाते, तिथे प्रत्येक मुलगी खरोखरच सुरक्षित आहे का? तीन मुलींचा बाप म्हणून हा प्रश्न मला खूप खोलवर सतावत असतो. प्रत्येक वडिलांची इच्छा असते की, आपल्या मुलीने निर्भयपणे आपली स्वप्ने पूर्ण करावीत, आपल्या मनाप्रमाणे आयुष्य जगावे आणि ती जिथे जाईल तिथे तिचा आदर व्हावा.

View this post on Instagram

A post shared by Rajpal Naurang Yadav (@rajpalofficial)

‘कन्यापूजन हा केवळ एक विधी नाही’

पुढे त्याने लिहिलं की, “मुलींचा बाप म्हणून हा प्रश्न माझ्यासाठी अधिकच भावनिक आणि आहे. प्रत्येक वडिलांची इच्छा असते की, आपल्या मुलीने निर्भयपणे आपली स्वप्ने पूर्ण करावीत, स्वतःच्या अटींवर आयुष्य जगावे आणि सर्वत्र तिचा आदर व्हावा. देवी दुर्गेची उपासना तेव्हाच खऱ्या अर्थाने अर्थपूर्ण ठरेल, जेव्हा आपण तिची शक्ती केवळ मंदिरांमध्येच नव्हे, तर प्रत्येक स्त्रीबद्दल आदर बाळगून आणि तिची सुरक्षा सुनिश्चित होईल. या नवरात्रीत, आपण केवळ देवीच्या पूजेपुरते स्वतःला मर्यादित ठेवू नये. आपल्या मुलींना धैर्याने जगायला शिकवण्याचा आणि त्यांना असे जग देण्याचा संकल्प करूया, जिथे त्यांना त्यांच्या सुरक्षेसाठी दररोज संघर्ष करावा लागणार नाही. कारण कन्यापूजन हा केवळ एक विधी नाही, तर तो आपल्याला प्रत्येक मुलीच्या सन्मानाचे आणि हक्कांचे रक्षण करण्याच्या आपल्या जबाबदारीची आठवण करून देतो”, असं राजपालने म्हटलं आहे.