चित्रपट चाहत्यांसाठी एक वाईट बातमी, अक्षय कुमार जखमी, अ‍ॅक्शन सीनच्या चित्रीकरणादरम्यान अपघात
अक्षय कुमारच्या चाहत्यांसाठी एक खूप वाईट बातमी आहे. एका अ‍ॅक्शन सीनच्या चित्रीकरणादरम्यान अनपेक्षित प्रकार घडला आहे. अक्षय कुमार टायगर श्रॉफ याच्यासोबत चित्रीकरण करत असताना अपघात घडलाय.
मुंबई : बॉलिवूड अभिनेता अक्षय कुमार (Akshay Kumar) याच्या चाहत्यांसाठी एक वाईट बातमी आहे. अक्षय कुमार आगामी चित्रपटाच्या अ‍ॅक्शन सीनच्या चित्रीकरणादरम्यान जखमी झाल्याची माहिती समोर आली आहे. अक्षय कुमार त्याच्या फिटनेससाठी ओळखला जातो. तो त्याच्या फिटनेसची खूप काळजी घेतो. त्यामुळे तो त्याने ठरवल्यानुसार पोषक आहार खातो. रात्री लवकर झोपतो आणि पहाटे लवकर उठून व्यायाम करतो. त्याच्या या जीवनशैलीचं नेहमी कौतुक होत असतं. त्याची आणखी एक विशेष गोष्ट म्हणजे तो चित्रपटामध्ये अ‍ॅक्शन सीनच्या शूटींग दरम्यान स्वत: स्टंट करतो. यासाठी तो कुणाचीही मदत घेत नाही. पण त्याचा हाच आत्मविश्वास त्याच्यासाठी घातक ठरला आहे. कारण एका चित्रपटाच्या शूटींग दरम्यान अपघाताची घटना घडलीय.
मिळालेल्या माहितीनुसार, अभिनेता टायगर श्रॉफ आणि अक्षय कुमार यांचा एक चित्रपट आगामी काळात प्रदर्शित होणार आहे. त्याच्या चित्रीकरणादरम्यान दुर्घटना घडली आहे. अक्षय कुमार आणि टायगर श्रॉफचा ‘बडे मियां छोटे मियां’ असा चित्रपट आगामी काळात प्रदर्शित होणार आहे. याच चित्रपटाच्या शूटींगदरम्यान अ‍ॅक्शन सीन चित्रित करत असताना अपघात घडला. त्यामुळे अभिनेता अक्षय कुमार जखमी झाला आहे.
जखमी झाल्यानंतरही क्लोज-अप सीन्ससाठी चित्रीकरण सुरु
‘बडे मियां छोटे मियां’ या चित्रपटाचं चित्रीकरण स्कॉटलंडला सुरु आहे. तिथे संबंधित अनपेक्षित घटना घडली आहे. या अपघातात अक्षय कुमारला सुदैवाने फार गंभीर दुखापत झालेली नाही, अशी दिलासादायक माहितीदेखील समोर आलीय. विशेष म्हणजे जखमी झाल्यानंतरही अक्षय कुमार आपल्या चित्रपटाच्या टीमसोबत चित्रीकरण करत आहेत.
अक्षय कुमार जखमी असताना क्लोज-अप सीन्ससाठी शूट करत आहेत. कारण चित्रपटाच्या चित्रीकरणाला खूप खर्च होतो. यासाठी चित्रीकरणाचा दौरा ठरलेला असतो. त्या वेळेत चित्रीकरण पूर्ण करायचा प्लॅन असतो. याशिवाय इतर कलाकारांचे इतर प्रोजेक्ट्सही असतात. त्यामुळे स्कॉटलंडला चित्रीकरण करण्यात उशिर होऊ नये, यासाठी चित्राकरण सुरु आहे.
दिग्दर्शक अली अब्बास जफर या चित्रपटाचं दिग्दर्शन करत आहेत. त्यांना याआधी प्रदर्शित झालेल्या टायगर जिंदा है, सुल्तान, भारत, मेरे ब्रदर की दुल्हन, गुंडे सारख्या अनेक मोठ्या चित्रपटांसाठी केलेल्या कामांसाठी ओळखलं जातं.