Saawan Kumar Tak | प्रसिद्ध लेखक आणि निर्माते सावन कुमार टाक रुग्णालयात दाखल, प्रकृती चिंताजनक

मुंबई : प्रसिद्ध लेखक आणि निर्माते सावन कुमार टाक (Saawan Kumar Tak) यांची प्रकृती खराब झाल्याने त्यांना रुग्णालयात दाखल करण्यात आलंय. सावन कुमार टाक यांच्यावर मुंबईतील अंधेरी येथील कोकिलाबेन धीरूभाई अंबानी रुग्णालयात सध्या उपचार (Treatment) सुरू आहेत. गेल्या काही दिवसांपासून सावन कुमार टाक यांना आरोग्याच्या समस्या निर्माण झाल्यात. टाक यांनी सलमान खानसह अनेक बड्या बॉलिवूड (Bollywood) कलाकारांसोबत काम केले आहे. सूत्रांच्या माहितीनुसार गेल्या काही दिवसांपासून सावन कुमार टाक हे फुफ्फुसाच्या आजाराशी झुंज देत आहेत.

सावन कुमार टाक आयसीयूमध्ये दाखल

सावन कुमार टाक यांना रूग्णालयात दाखल केल्याची बातमी वाऱ्यासारखी पसरत आहे. काही दिवसांपूर्वीही त्यांना कोकिलाबेन रुग्णालयात दाखल करण्यात आले होते. सूत्रांनी दिलेल्या माहितीनुसार, सावन कुमार टाक हे आयसीयूमध्ये असून त्यांचे हृदय व्यवस्थित काम करत नाहीये. याशिवाय त्यांना इतरही आजार झाल्याची माहिती मिळते आहे. सध्या त्यांची प्रकृती चिंताजनक असल्याची प्राथमिक माहिती मिळते आहे.

हृदय व्यवस्थित काम करत नसल्याने सावन कुमार यांना रूग्णालयात केले दाखल

सावन कुमार यांनी आपल्या करिअरमध्ये मोठ्या स्टार्ससोबत काम केले आहे. निर्माता म्हणून त्यांनी नौनिहाल हा पहिला चित्रपट बनवला. या चित्रपटात संजीव कुमार मुख्य भूमिकेत होते. त्याच वेळी, दिग्दर्शक म्हणून त्यांनी मीना कुमारीला त्यांच्या चित्रपटासाठी कास्ट केले. दिग्दर्शक म्हणून त्यांचा पहिला चित्रपट गोमती के किनरे हा 1972 साली आला होता. सावन कुमार टाक यांनी संजीव कुमार तसेच मीना कुमारी, राजेश खन्ना, जितेंद्र, श्रीदेवी, जया प्रदा आणि सलमान खान यांसारख्या सर्व मोठ्या स्टार्ससोबत काम केले आहे.