लग्नाआधी ‘हा’ करार आवर्जून करा; अभिनेत्रीचा मुलींना सल्ला, म्हणाली “एकदा गोष्टी बिघडल्या की..”

लग्न हे प्रेम, विश्वास, वचनं यांवर आधारित बंधन असल्याचं अनेकदा म्हटलं जातं. परंतु हल्लीच्या आधुनिक काळात या लग्नसंस्थेला पूर्णपणे वेगळंच स्वरुप प्राप्त झालं आहे. दोन व्यक्तींच्या नात्यातील आर्थिक सुरक्षितता, हा देखील सध्या चर्चेचा विषय बनला आहे. जेव्हा एखाद्या जोडप्याचा संसार संपुष्टात येतो आणि ते विभक्त होतात, तेव्हा त्यांच्या मुलांवर त्याचा परिणाम झाल्याचं पहायला मिळतं. अभिनेत्री सेलिना जेटली सध्या अशाच कठीण काळाचा सामना करत आहे. सेलिनाने तिच्या आयुष्यात जे काही सहन केलं, त्यानंतर तिने लग्न करू पाहणाऱ्या मुलींना आणि महिलांना एक सल्ला दिला आहे. ज्या महिलांकडे स्वत:ची मालमत्ता आहे, त्यांनी लग्नाआधीच विवाहपूर्व करार करावा, असा सल्ला तिने दिला आहे. प्रेमावर आधारित नात्यांमध्येही आर्थिक स्वातंत्र्य महत्त्वाचं असतं, असं तिने म्हटलंय.

‘इंडिया टुडे’ला दिलेल्या मुलाखतीत सेलिना म्हणाली, “मुलींनो, तुमची स्वत:ची मालमत्ता असेल तर कृपया विवाहपूर्व करार करा, असा मी सल्ला देईन. नातेसंबंधांची सुरुवात अनेकदा प्रेम आणि कायम एकत्र राहण्याच्या वचनांनी होते, परंतु दोन व्यक्तींमधील मतभेद विकोपाला जाऊ शकतात आणि एकदा गोष्टी बिघडल्या की शेवटी ते प्रकरण मालमत्ता आणि संपत्तीपर्यंत येऊन पोहोचू शकतं. अगदी घट्ट भावनिक बंधसुद्धा नंतर भौतिक मालमत्तेच्या वादात बदलू शकतात.” सेलिनाने असा सल्ला देण्यामागे तिचा स्वत:चा कटू अनुभव आहे.

सेलिना जेटली सध्या तिच्या वैवाहिक आयुष्यात खूप कठीण काळाचा सामना करत आहे. पती पीटर हागसोबत तिचा घटस्फोटाचा खटला सुरू आहे. मुलांचा ताबा मिळावा, यासाठी ती प्रयत्न करत आहे. सेलिनाने तिचा पती पीटर हागवर कौटुंबिक हिंसाचार, मारहाण आणि शारीरिक छळाचे आरोप केले आहेत. या दोघांमधील वाद आता संपत्तीच्या मुद्द्यांपर्यंत पोहोचला आहे.

सेलिनाची वकील निहारिका मिश्रा यांनी ‘न्यूज 18’ला दिलेल्या मुलाखतीत सांगितलं, “पीटरने सेलिनाचे सर्व क्रेडिट आणि डेबिट कार्ड्स काढून घेतले होते. तो स्वत:चा आणि कुटुंबाचा खर्च भागवण्यासाठी सेलिनाच्या सर्व सेव्हिंग्स वापरत होता. सेलिना जेव्हा त्याला त्याच्या पगाराबद्दल विचारायची, तेव्हा तो खूप चिडायचा. नंतर असंही उघड झालं की पीटरने गेल्या वर्षी व्हिएन्नामध्ये त्यांनी एकत्र खरेदी केलेली मालमत्ता तिला न कळवता परस्पर विकली होती. सध्या ऑस्ट्रियामध्ये पीटर कायदेशीर कायर्वाहीद्वारे हे सिद्ध करण्याचा प्रयत्न करत आहे की सेलिनाचा कोणताही संयुक्त मालमत्तेवर हक्क नाही.”

सेलिनाने असाही खुलासा केला की तिच्या पतीने तिच्याकडून 20 कोटी रुपयांची मालमत्ता स्वत:च्या नावावर हस्तांतरित करवून घेतली. नंतर त्याने लग्नापूर्वी तिच्या मालकीच्या मालमत्तेवरूनही तिचा हक्क काढून घेतला. लग्नाच्या 15 व्या वाढदिवशी तिला पतीने घटस्फोटाची कागदपत्रे पाठवली होती. सेलिना आणि पीटर हाग यांनी 2010 मध्ये ऑस्ट्रियामध्ये लग्न केलं. त्यांना तीन मुलं आहेत.