रमेश म्हात्रे प्रकरण ताजे असतानाच भाजपचा माजी नगरसेवकही वादात, अभिमन्यू गायकवाड यांच्याकडून प्लंबरला रॉडने मारहाण?

Kalyan BJP Abhimanyu Gaikwad: कल्याण-डोबिंवली महानगरपालिकेचे शिंदे सेनेचे नगरसेवक रमेश म्हात्रे यांनी डोंबिवलीतील शास्त्रीनगर येथील शासकीय रुग्णालयात महिला डॉक्टर, नर्स आणि कर्मचाऱ्यांना मारहाण केली होती. त्याचे तीव्र पडसाद उमटले होते. तर ठाण्यातील मानपाडा भागात 29 सप्टेंबर रोजी ठाकरे सेनेचे विभागप्रमुख प्रदीप पूर्णेकर यांची निर्घृण हत्या करण्यात आली. यामुळे ठाण्यात सध्या राजकीय वातावरण तापलेले आहे. त्यात अजून एका नवीन वादाची भर पडली आहे. भाजपच्या माजी नगरसेवकावर प्लंबरला रॉडने मारहाण करण्यात आल्याचा गंभीर आरोप करण्यात आला आहे.

थकीत पैशावरून रॉडने मारहाण

कल्याण पूर्वेत भाजपच्या माजी नगरसेवकाच्या कार्यालयात थकीत पैशांवरून मोठा राडा झाला. इमारतीतील प्लंबिंगच्या कामाचे थकीत पैसे मागितल्याने भाजपचे माजी नगरसेवक अभिमन्यू गायकवाड आणि त्यांच्या मुलांनी रॉडने मारहाण केल्याचा प्लंबर भगवान म्हात्रे यांनी आरोप केला.तर गायकवाड यांनी हे सर्व आरोप फेटाळले आहेत.याप्रकरणात दोघे किरकोळ जखमी झाले आहेत. तर याप्रकरणी एकमेकांविरोधात गुन्हे दाखल करण्यात आले आहेत.

अतिदक्षता विभागात उपचार

म्हात्रे यांनी इमारतीत प्लबिंगचे काम केले होते. पण गेल्या काही वर्षांपासून हे पैसे थकलेले होते. त्याची मागणी वारंवार ते करत होते. दिवाळी असल्याने त्यांनी पुन्हा पैशांची मागणी केली. ५० हजार रुपये थकले होते. ते मागण्यासाठी आपण गेलो होतो. पाच ते सहा वर्षांपूर्वी प्लबिंगचे काम त्यांच्या इमारतीत केले होते. त्याचे पेमेंट मागायला अभिमन्यू गायकवाड यांच्याकडे गेलो होतो. त्यांना पेमेंट मागितले तर त्यांनी शिवीगाळ केली. मला रॉडने मारहाण केली. त्यांनी आणि मुलांनी मला मारहाण केली, अशी माहिती भगवान म्हात्रे यांनी दिली. त्यांच्यावर सध्या एका खासगी रुग्णालयात अतिदक्षता विभागात उपचार सुरू आहेत.

गायकवाड यांचा म्हात्रेंवरच आरोप

तर भगवान म्हात्रे यांचे पैसे आपले चुलत भाऊ संदीप गायकवाड यांच्याकडे बाकी असून पैसे मागण्यासाठी कार्यालयात आलेल्या म्हात्रे यांनीच शिवीगाळ आणि धक्काबुक्की केल्याचा माझी नगरसेवक अभिमन्यू गायकवाड यांनी दावा केला आहे. म्हात्रे यांच्या अंगावरील जखमा जुन्या असल्याचेही ते म्हणाले. या वादात दोन्ही बाजूंचे मिळून दोघे किरकोळ जखमी झाले आहेत. कोळसेवाडी पोलीस ठाण्यात एकमेकांविरोधात गुन्हे दाखल करण्यात आले आहेत. पोलिसांकडून याप्रकरणात पुढील तपास करण्यात येत आहे.