Celina Jaitly : पैसे नसतील तर सफाई कामगाराची नोकरी कर…नवऱ्याकडून छळ, मुलंही दुरावली, लोकप्रिय अभिनेत्रीनं सांगितली आपबिती
Celina Jaitly : सेलिना जेटलीनं तिचा पती पीटर हागवर घरगुती हिंसाचाराचा गंभीर आरोप केला आहेत. अभिनेत्रीनं दावा केला आहे की, ती अजूनही तिच्या तीन मुलांच्या ताबा हक्कासाठी कायदेशीर लढाई लढत आहे.
बॉलिवूड अभिनेत्री सेलिना जेटली सध्या तिच्या वैयक्तिक आयुष्यात कठीण काळातून जात आहे. ऑस्ट्रियन व्यावसायिक पीटर हागपासून विभक्त झाल्यानंतर, अभिनेत्रीनं सोशल मीडियावर तिच्या अडचणी आणि घटस्फोटाच्या वादाबद्दल अनेक गंभीर दावे केले आहेत. एका पोस्टमध्ये, सेलिनानं आरोप केला आहे की, तिनं आपल्या मुलांच्या भल्यासाठी पतीपासून परस्पर संमतीनं विभक्त होण्याची विनंती केली होती, परंतु तिला ती संधी नाकारण्यात आली. अभिनेत्रीनं असाही दावा केला आहे की कायदेशीर खर्च भागवण्यासाठी तिला क्लिनर म्हणून काम करण्याचा सल्लाही देण्यात आला होता. सेलिनानं तिच्या पोस्टमध्ये मुलांपासून विभक्त होणं, मालमत्तेचे वाद आणि मुलांच्या ताब्यासाठीची लढाई यांचाही उल्लेख केला आहे.
सेलिनानं सांगितलं की, ती १२ ऑक्टोबर रोजी महत्त्वाची कागदपत्रे, तिच्या दिवंगत आईच्या साड्या आणि अनेक भावनिक आठवणींनी भरलेली सुटकेस घेऊन मुंबईत आली होती. अभिनेत्रीनं याला तिच्या आयुष्यातील सर्वात कठीण निर्णय म्हटलं आहे. सेलिनानं सांगितलं की, सप्टेंबर २०२५ च्या सुरुवातीला, तिला वाटलं होतं की, तिचा पती, पीटर हाग, त्यांच्या लग्नाच्या १५ व्या वाढदिवसानिमित्त तिला भेटवस्तू देणार आहे. पण, जेव्हा ती पोस्ट ऑफिसमध्ये पोहोचली, तेव्हा तिला घटस्फोटाची नोटीस आढळली. अभिनेत्रीनं लिहिलं आहे की, या घटनेमुळे ती भावनिकदृष्ट्या पूर्णपणे खचून गेली. यामुळे विभक्त होण्याची आणि त्यानंतर कायदेशीर वादाची परिस्थिती निर्माण झाली.
‘स्वच्छता कर्मचारी म्हणून काम करण्यास सांगितलं’
सेलिनाने दावा केला आहे की, पहिल्या घटस्फोटाच्या सुनावणीदरम्यान, न्यायाधीशांनी त्यांना परस्पर संमतीनं विभक्त होण्याचा मार्ग शोधण्यासाठी नोव्हेंबरपर्यंतची मुदत दिली होती. अभिनेत्रीच्या म्हणण्यानुसार, मुलांचं भविष्य आणि कौटुंबिक परिस्थिती लक्षात घेऊन तिनं आपल्या पतीला एकत्र निर्णय घेऊन विभक्त होण्याचा निर्णय घेण्यास सांगितलं. अभिनेत्रीनं आरोप केला आहे की, जेव्हा तिनं कायदेशीर लढाईचा खर्च भागवण्यात अडचण येत असल्याचं सांगितलं, तेव्हा तिला तिच्या वकिलांशी बोलण्यास सांगितलं गेलं. सेलिनाचा दावा आहे की, तिला असेही सांगण्यात आलं होतं की, जर तिचे पैसे संपले तर ती स्वच्छता कर्मचारी म्हणून काम करू शकते.
अभिनेत्रीनं दावा केला आहे की, घटस्फोटानंतर जर तिला आपल्या मुलांशी संपर्क ठेवायचा असेल, तर ती ऑस्ट्रिया सोडून जाऊ शकत नाही, असं तिला सांगण्यात आलं होतं. तिनं असाही आरोप केला की, ऑस्ट्रियामधील संयुक्त बँक खात्यांमध्ये तिला प्रवेश नव्हता आणि भारतात तिच्या लग्नापूर्वी खरेदी केलेल्या मालमत्ता विकण्याचे प्रयत्न केले जात होते. सेलिनाच्या म्हणण्यानुसार, त्यावेळी तिच्या भावाची परिस्थितीही तिच्यासाठी चिंतेचा विषय होती. तिच्यावर सतत पाळत ठेवली जात होती आणि तिला मानसिकदृष्ट्या त्रास देण्याचा प्रयत्न केला जात होता. अभिनेत्रीनं सांगितलं की, ऑस्ट्रियामध्ये राहणाऱ्या शेजाऱ्यांच्या मदतीनं ती रात्री १ वाजण्याच्या सुमारास तेथून निघाली. त्यानंतर, तिनं एका हॉटेलमध्ये एक आठवडा घालवला आणि फोन व झूमद्वारे आपल्या मुलांशी संपर्क ठेवला.
सेलिना जेटली आणि पीटर हाग यांचं २०१० मध्ये हैदराबाद येथे लग्न झालं. त्यांना तीन मुलं आहेत. अभिनेत्रीनं नोव्हेंबर २०२५ मध्ये मुंबई न्यायालयात घटस्फोटासाठी अर्ज दाखल केला. सध्या, दोघांमधील कायदेशीर वाद सुरू आहे. सेलिनाच्या अलीकडील पोस्टमुळे त्यांच्यातील वैवाहिक मतभेद आणि मुलांच्या ताब्यासाठीचा लढा पुन्हा एकदा चर्चेत आला आहे.
