90 च्या दशकातील हे गाणं ऐकण्यासाठी रेडिओवर वाट बघायचे लोक, आजही ते गाणं प्रचंड लोकप्रिय

बॉलिवूडचे लोकप्रिय पार्श्वगायक कुमार सानू यांनी आपल्या सुरेल आवाजाने अनेक अजरामर गाणी संगीतप्रेमींना दिली आहेत. विशेषतः प्रेमाची भावना व्यक्त करणाऱ्या त्यांच्या रोमँटिक गाण्यांची जादू आजही कायम आहे. 90 च्या दशकात त्यांच्या आवाजातील अनेक गाणी प्रचंड लोकप्रिय झाली होती. त्यापैकी एक गाणं आजही चाहत्यांच्या ओठांवर आहे. हे गाणं म्हणजे 1995 मध्ये प्रदर्शित झालेल्या ‘गॅम्बलर’ चित्रपटातील ‘हम उनसे मोहब्बत करके’.

‘हम उनसे मोहब्बत करके’ या गाण्याला कुमार सानू आणि साधना सरगम यांनी आपला आवाज दिला आहे. प्रेमात पडल्यावर मनाची होणारी अवस्था, प्रिय व्यक्तीची आठवण आणि तिच्याशिवाय झोप न लागण्याची बेचैनी या भावना गाण्यातून सुंदरपणे व्यक्त करण्यात आल्या आहेत. त्यामुळे हे गाणं त्या काळातील प्रेमी युगुलांमध्ये विशेष लोकप्रिय झालं होतं. आजही जुन्या रोमँटिक गाण्यांची आवड असणारे चाहते हे गाणं आवर्जून ऐकतात.

अनु मलिक यांनी दिलं होतं संगीत

या गाण्याचे बोल नवाब आरजू यांनी लिहिले असून, प्रसिद्ध संगीतकार अनु मलिक यांनी त्याला संगीत दिलं आहे. गाण्याची रोमँटिक धून आणि कुमार सानू-साधना सरगम यांचा सुरेल आवाज यामुळे या गाण्याला वेगळीच लोकप्रियता मिळाली होती. विशेष म्हणजे, या गाण्यात अभिनेत्री शिल्पा शेट्टीने परिधान केलेला लाल रंगाचा ड्रेसही त्या काळात चर्चेचा विषय ठरला होता.

‘गॅम्बलर’ हा 1995 मध्ये प्रदर्शित झालेला अ‍ॅक्शन-कॉमेडी चित्रपट आहे. दयाल निहलानी यांनी या चित्रपटाचं दिग्दर्शन केलं होतं. यात गोविंदा, शिल्पा शेट्टी, आदित्य पांचोली आणि गुलशन ग्रोव्हर यांच्या प्रमुख भूमिका होत्या. चित्रपटात गोविंदाने पोलीस इन्स्पेक्टर दयाशंकर पांडे यांची भूमिका साकारली होती.

बॉक्स ऑफिसवरही ठरला होता यशस्वी

‘गॅम्बलर’ चित्रपटाने बॉक्स ऑफिसवर चांगली कामगिरी केली होती. उपलब्ध रिपोर्ट्सनुसार, या चित्रपटाचं बजेट सुमारे 5.50 कोटी रुपये होतं, तर चित्रपटाने बॉक्स ऑफिसवर जवळपास 12.02 कोटी रुपयांची कमाई केली होती. चित्रपटातील गोविंदा आणि शिल्पा शेट्टी यांच्या अभिनयासोबतच ‘हम उनसे मोहब्बत करके’ या गाण्यानेही प्रेक्षकांच्या मनात विशेष स्थान निर्माण केलं. चित्रपटाला जवळपास तीन दशकं उलटली असली तरी या गाण्याची लोकप्रियता आजही कायम आहे.