Nana Patekar: नाना पाटेकर ब्राह्मण होते, त्यांच्यात हावरटपणा..; ममता कुलकर्णींचं वक्तव्य चर्चेत

Mamta Kulkarni on Nana Patekar: ज्येष्ठ अभिनेते नाना पाटेकर यांच्या निधनानंतर त्यांच्या अभिनयासोबतच सामाजिक कार्याचीही चर्चा सुरू आहे. आपल्या कमाईचा उपयोग गरजू लोकांसाठी करणारे नाना अनेकांसाठी प्रेरणास्थान ठरले. शेतकरी, दुष्काळग्रस्त कुटुंबं आणि ग्रामीण भागातील लोकांसाठी त्यांनी केलेल्या कामाची नेहमीच प्रशंसा झाली. आता अभिनेत्री ममता कुलकर्णी हिने नाना पाटेकर यांच्या स्वभावाविषयी आणि सामाजिक कार्याविषयी केलेल्या वक्तव्यामुळे नव्याने चर्चा सुरू झाली आहे. नाना यांच्या आर्थिक दृष्टिकोनाचा उल्लेख करत तिने त्यांच्या साधेपणाचं कौतुक केलं. विशेष म्हणजे, यावेळी तिने नानांच्या ब्राह्मण असण्याचाही उल्लेख केला.

नाना पाटेकर यांच्या सामाजिक कार्याविषयी बोलताना ममता कुलकर्णी म्हणाली की, नाना पाटेकरसुद्धा ब्राह्मण होते. मात्र, जातीचा उल्लेख करताना आपल्याला जातिवाद आणायचा नसल्याचंही तिने स्पष्ट केलं. ब्राह्मण कुटुंबात धार्मिक संस्कार, पूजा आणि पाठ यांना महत्त्व दिलं जातं, असं मत तिने मांडलं. तिच्या मते, या संस्कारांचा व्यक्तीच्या विचारांवर आणि जीवनाकडे पाहण्याच्या दृष्टिकोनावर परिणाम होऊ शकतो. ममता कुलकर्णीने नाना पाटेकर यांच्या स्वभावातील एका महत्त्वाच्या पैलूकडे लक्ष वेधलं. चित्रपटसृष्टीतील इतर कलाकारांनी मोठ्या प्रमाणात पैसे कमावले असताना नाना मात्र स्वतःच्या कमाईत समाधानी होते. अधिकाधिक पैसा मिळवण्याचा हव्यास त्यांच्यात नव्हता, असं तिने सांगितलं.

याविषयी ममता कुलकर्णी म्हणाली, “नाना पाटेकरसुद्धा ब्राह्मण होते. ब्राह्मण म्हणजे मला इथे कुठेच जातिवाद आणायचा नाही. मला हे म्हणायचं आहे की ब्राह्मण कशाला जन्माला येतो? कारण त्यात थोडीशी परमेश्वराची जागृत अवस्था असते… म्हणून कुळ ब्राह्मण. ब्राह्मणच पंडित का असतात? तर त्यांच्यावर घरीच सर्व संस्कार केले जातात.. पूजा, पाठ वगैरे. कितीही झालं तरी ते ब्राह्मण आहेत. त्यांच्यात जास्त हावरटपणा नव्हता. त्यांच्याबरोबरच्या लोकांनी जेवढे पैसे कमावले, त्या तुलनेत नाना पाटेकर हे स्वत:च्या कमाईत खुश होते. म्हणूनच तुम्ही पाहू शकता की, ब्राह्मण इतर सामाजिक कार्यही करू शकतात.”

नानांनी आपल्या कारकिर्दीत अनेक गाजलेल्या चित्रपटांमध्ये काम केलं. अभिनयाच्या जोरावर त्यांनी स्वतःचं वेगळं स्थान निर्माण केलं. मात्र, प्रसिद्धी आणि पैसा यांच्यापलीकडे जाऊन समाजासाठी काहीतरी करण्याला त्यांनी महत्त्व दिलं. ममता कुलकर्णीच्या मते, नानांचा हा दृष्टिकोन त्यांच्या व्यक्तिमत्त्वातील साधेपणा दाखवतो. नाना पाटेकर यांनी अभिनेते मकरंद अनासपुरे यांच्या साथीने ‘नाम फाऊंडेशन’च्या माध्यमातून सामाजिक कार्याला हातभार लावला. महाराष्ट्रातील दुष्काळग्रस्त भागांमध्ये जलसंधारण, शेतकऱ्यांना मदत आणि ग्रामीण भागातील समस्यांवर काम करण्यासाठी संस्थेने विविध उपक्रम राबवले.

चित्रपटसृष्टीतून मिळालेल्या लोकप्रियतेचा उपयोग समाजातील गरजू लोकांसाठी करता येतो, हे नानांनी आपल्या कृतीतून दाखवून दिलं. त्यांच्या कामामुळे अनेकांना मदतीचा हात मिळाला. त्यामुळे त्यांच्या अभिनयाइतकंच त्यांच्या सामाजिक योगदानाचंही कौतुक केलं जातं.