Sidhu Moose Wala: सिद्धू मूसेवालाचं SYL गाणं प्रदर्शित; अवघ्या काही तासांत मिळाले तब्बल इतके व्ह्यूज

Sidhu Moose Wala

Image Credit source: Youtube

पंजाबी गायक (Punjabi Singer) सिद्धू मूसेवालाच्या (Sidhu Moose Wala) हत्येच्या तीन आठवड्यांनंतर त्याचं ‘SYL’ हे गाणं प्रदर्शित करण्यात आलं. सिद्धूचं हे शेवटचं गाणं ठरलंय. त्याच्या अधिकृत युट्यूब चॅनलवर हे गाणं प्रदर्शित करण्यात आलं. युट्यूबवर हे गाणं प्रदर्शित होताच त्यावर चाहत्यांकडून लाइक्स आणि कमेंट्सचा वर्षाव होऊ लागला. अनेकांनी सिद्धूसाठी भावनिक मेसेज लिहिले आहेत. ‘SYL’ हे गाणं सिद्धूनेच लिहिलं, गायलं आणि संगीतबद्ध केलं होतं. त्याच्या हत्येच्या काही आठवड्यांपूर्वी हे गाणं रेकॉर्ड करण्यात आलं होतं. सिद्धूची अजूनही काही गाणी अद्याप प्रदर्शित करण्यात आली नाहीत. 29 मे रोजी पंजाबमधल्या मनसा जिल्ह्यातील एका गावात सिद्धूची गोळ्या झाडून हत्या करण्यात आली. पंजाब पोलिसांनी (Punjab Police) सुरक्षा काढून घेतल्यानंतर दुसऱ्याच दिवशी त्याची हत्या करण्यात आली.

सिद्धूच्या या गाण्याला युट्यूबवर अवघ्या 30 मिनिटांत दशलक्षांहून अधिक व्ह्यूज मिळाले आहेत. तर गेल्या 14 तासांत एक कोटींहून अधिक व्ह्यूज आणि दोन दशलक्षांहून अधिक लाइक्स मिळाले आहेत. ‘सिद्धू अजूनही आपल्यात आहे, हे गाणं त्याचा पुरावा आहे’, असं एकाने लिहिलं. तर ‘सिद्धूचा आवाज आजही जिवंत आहे’ असं दुसऱ्याने म्हटलंय.

सिद्धूचं गाणं-

8 मे रोजी पंजाबी ग्लोबल फाऊंडेशनच्या गुरप्रीत कौर चढ्ढा यांनी मुंबईत दिवंगत गायक सिद्धू मूसेवालासाठी प्रार्थना सभेचं आयोजन केलं होतं. प्रार्थनेच्या वेळी उपस्थितांना संबोधित करताना सिद्धूचे वडील भावूक झाले होते. “माझ्या मुलाचा काय दोष होता, ज्यामुळे त्याची हत्या करण्यात आली. त्याला न्याय मिळेपर्यंत आम्ही स्वस्थ बसणार नाही”, असं ते म्हणाले.

सिद्धूच्या हत्येप्रकरणी पंजाबपासून दिल्ली, हरयाणा, राजस्थान, उत्तराखंड, उत्तरप्रदेश इतकंच नव्हे तर कॅनडापर्यंतचं कनेक्शन समोर आलं आहे. हत्येपूर्वी सिद्धूच्या घराबाहेर रेकी करताना आणि हत्येनंतर धावत्या गाड्यासुद्धा सीसीटीव्ही कॅमेऱ्यात कैद झाल्या. सिद्धूच्या हत्येनंतर आरोपींनी जी ऑल्टो कार लुटली होती, पोलिसांन तीसुद्धा जप्त केली आहे.