KBC 14: स्पर्धकाने बिग बींवर लावला कर्जाचा आरोप, अमिताभ बच्चन यांनी व्याजासह 10 रुपये केले परत
यावेळी त्यांनी शोचे होस्ट अमिताभ बच्चन (Amitabh Bachchan) यांच्यावर मोठा आरोप केला. त्यांचा आरोप ऐकून अमिताभ बच्चनसुद्धा काही काळ स्तब्ध झाले.
दुलीचंद अग्रवाल यांनी सोनी टीव्हीच्या क्विझ रिॲलिटी शो ‘कौन बनेगा करोडपती 14’मधून (Kaun Banega Crorepati) 50 लाख रुपये जिंकले आहेत. मात्र, यावेळी त्यांनी शोचे होस्ट अमिताभ बच्चन (Amitabh Bachchan) यांच्यावर मोठा आरोप केला. त्यांचा आरोप ऐकून अमिताभ बच्चनसुद्धा काही काळ स्तब्ध झाले. खरं तर, छत्तीसगडच्या पिथोरा इथले रहिवासी असलेल्या दुलीचंद अग्रवाल यांनी जेव्हा बिग बींची 3 लाख 20 हजार जिंकल्याची घोषणा ऐकली, तेव्हा त्यांनी लगेच बिग बींना सांगितलं की, “तुम्ही मला देत असलेल्या 3 लाख 20 हजार रुपयांमध्ये 10 रुपये कमी आहेत.” अमिताभ बच्चन यांनी दुलीचंद (Dulichand) यांचं म्हणणं ऐकलं तेव्हा त्यांना धक्काच बसला. दुलीचंद यांनी अमिताभ बच्चन यांना सांगितलं की, त्यांचा 1977 चा हिशोब त्यांच्याकडे पेंडिंग आहे. बिग बींवर 10 रुपयांचं त्यांचं कर्ज आहे. अमिताभ बच्चन देखील हसले आणि म्हणाले “मी तुमचा ऋणी आहे, पण काही हरकत नाही. हा खेळ संपल्यानंतर मी तुम्हाला 20 रुपये देईन.”
काय आहे 10 रुपयांच्या कर्जाचा किस्सा?
दुलीचंद यांचा हा किस्सा ऐकून प्रेक्षकदेखील थक्क झाले. डीसी अर्थात दुलीचंद म्हणाले की, “मी कॉलेजमध्ये होतो, जेव्हा तुमचा मुकद्दर का सिकंदर हा चित्रपट 1977 मध्ये प्रदर्शित झाला होता. त्या काळात आमच्याकडे फारसे पैसे नव्हते. पण मला तो चित्रपट बघायचा होता. खिशात 10 रुपये घेऊन हा चित्रपट पाहण्यासाठी मी थिएटरमध्ये गेलो होतो. मला वाटलं 1 रुपयाचं तिकीट काढावं आणि उरलेल्या पैशांनी समोसे खावे. ते 10 रुपये कसे खर्च करायचे हे सर्व मी ठरवलं होतं.”
पुढे दुलीचंद म्हणाले, “मी तिकिटाच्या रांगेत उभा राहिलो, खूप गर्दी होती. एवढी गर्दी होती की पोलिसही आले होते. लांबच लांब रांगेत उभं राहिल्यावर शेवटी माझा नंबर आला. मी तिकीटाच्या खिडकीवर जाऊन तिकीट काढण्यासाठी खिशात हात घातला तेव्हा माझे 10 रुपये चोरीला गेल्याचं मला समजलं. तेव्हा मी ठरवलं की मी ‘मुकद्दर का सिकंदर’ अजिबात पाहणार नाही आणि जरी पाहिला तर तो तुमच्यासोबत बघेन. त्यांचं हे बोलणे ऐकून अमिताभ बच्चन म्हणाले, “तुमचे शब्द ऐकून मी भावूक झालो आहे. या एपिसोडमध्ये अमिताब बच्चन यांनी दुलीचंद यांना 20 रुपये दिले. मी तुमचं कर्ज व्याजासह परत करतो असं म्हणत त्यांनी पैसे परत केले.
