Mattress Care : गादीवर झोपताना जुनाट कुबट वास येतोय? गादी न धुता फक्त ही ट्रिक वापरा, टेन्शनच संपेल!

गादीवर झोपताना अचानक कुबट किंवा जुनाट वास जाणवतोय ? गादी धुणं शक्य नाही आणि फक्त वासामुळे नवीन गादी घ्यायचीही इच्छा नाही? मग घरातल्या काही साध्या गोष्टी तुमच्या कामी येऊ शकतात . गादीवर सतत वापरामुळे घाम, शरीरावरील तेल, धूळ, मृत त्वचा आणि ओलावा जमा होऊ शकतो. त्यामुळे कालांतराने गादीला वास येण्याची शक्यता वाढते. मात्र काही सोप्या उपायांनी गादी धुवून न काढताही ती फ्रेश ठेवता येते.

गादी आधी व्हॅक्यूम करा.

गादीवर सतत वापरामुळे धूळ, केस, घाम आणि त्वचेचे छोटे कण जमा होतात. त्यामुळे गादीला हळूहळू कुबट किंवा जुनाट वास येऊ शकतो. वास घालवण्याआधी संपूर्ण गादी व्हॅक्यूम क्लिनरने व्यवस्थित स्वच्छ करा.

काही तास गादीला कडक उन्हात वाळवा

गादीला येणारा कुबट वास कमी करण्यासाठी तिला काही तास उन्हात ठेवू शकता. सूर्यप्रकाशामुळे गादीतील अतिरिक्त ओलावा कमी करण्यासाठी मदत होते. गादीची दोन्ही बाजू व्यवस्थित सुकण्यासाठी ती मधेच पलटून ठेवा.

बेकिंग सोडा ठरू शकतो उपयोगी

गादीवर बेकिंग सोडा हलक्या हाताने पसरवा आणि साधारण ६ ते ८ तास तसाच राहू द्या. यामुळे गादीतील ओलावा आणि कुबट वास शोषून घेण्यास मदत होऊ शकते. त्यानंतर गादी व्हॅक्युम करून बेकिंग सोडा पूर्णपणे काढून टाका.

व्हिनेगरचा हलका स्प्रे

पांढरा व्हिनेगर आणि पाणी समान प्रमाणात घेऊन मिश्रण तयार करा. हे मिश्रण गादीवर जास्त प्रमाणात न टाकता फक्त वास येणाऱ्य भागावर हलका स्प्रे करा. त्यानंतर गादी पूर्णपणे कोरडी होऊ द्या आणि वापरण्यापूर्वी व्हिनेगरचा वासही निघून जाऊ द्या.

चादर आणि उशीचे कव्हरही स्वच्छ ठेवा

कधी कधी गादीला येणारा वास फक्त गादीमुळे नसतो. चादर, उशीचे कव्हर आणि मॅट्रेस प्रोटेक्टरवर साचलेल्या घाम व धूळही याला कारणीभूत ठरू शकते. त्यामुळे यावस्तू नियमितपणे धुवून ठेवणे महत्त्वाचे आहे.

मॅट्रेस प्रोटेक्टरचा वापर करा

गादीवर मॅट्रेस प्रोटेक्टर वापरल्यास घाम, धूळ, डाग किंवा पाणी थेट गादीपर्यंत पोहोचण्यापासून काही प्रमाणात संरक्षण मिळू शकते. प्रोटेक्टर काढून धुता येत असल्याने गादी स्वच्छ ठेवणेही सोपे होते.

गादीवर ओलावा साचू देऊ नका

पाणी, चहा किंवा दुसरा कोणताही द्रव गादीवर सांडल्यास लगेच स्वच्छ करा. गादी ओलसर राहिल्यास कुबट वासासोबतच बुरशीची समस्याही निर्माण होऊ शकते. त्यामुळे गादी वापरण्यापूर्वी ती कोरडी आहे ना याची खात्री करा.