धक्कादायक! थेट इस्रायलच्या पंतप्रधान कार्यालयावर मिसाईल डागल्या, इराणच्या सर्वात भयंकर हल्ल्याने खळबळ!
अमेरिका-इस्रायल आणि इराण यांच्यातील युद्धात मोठी जीवितहानी होत आहे. अनेक इमारती उद्ध्वस्त होत आहेत. असे असतानाच आता इराणने इस्रायलवर सर्वात मोठा हल्ला केल्याचे म्हटले जात आहे.
America Israel War Update : इस्रायल-अमेरिका आणि इराण यांच्यातील युद्धाचा भडका उडाला आहे. इस्त्रायल, अमेरिका यांच्याकडून इराणवर मोठे हल्ले केले जात आहे. या हल्ल्यांमध्ये इराणच्या अनेक लोकांचा मृत्यू झाला आहे. तर इराणदेखील प्रत्युत्तरादाखल इस्रायलवर हल्ले करत आहे. इराणने आखाती देशांमधील काही अमेरिकन लष्करी तळांनाही लक्ष्य केलं आहे. अमेरिकेकडून तर इराणला थेट धमकी देण्यात आलेली आहे. इराणने आमच्यावर हल्ले केले तर याआधी कधीही न केलेला असा हल्ला आम्ही करू, अशी थेट धमकीच अमरिकेचे राष्ट्राध्यक्ष डोनाल्ड ट्रम्प यांनी दिलेल आहे. असे असतानाच आता जगात खळबळ उडवणारी माहिती समोर आली आहे. मिळालेल्या माहितीनुसार इराणने इस्रायलचे प्रमुख बेंजामीन नेतान्याहू यांच्या कार्यालयावरच क्षेपणास्त्र डागले आहेत.
कमांडरच्या कार्यालयावरही हल्ला
या युद्धाला आता आणखी धार चढली आहे. त्यामुळे मध्य-पूर्वेतील तणाव तर वाढलाच आहे, परंतु या संघर्षाचा संपूर्ण जगाने धसका घेतला आहे. आता ताज्या माहितीनुसार इराणच्या इस्लामिक रिव्होल्यूशनरी गार्ड कॉर्प्सने (IRGC) इस्रायलमधील तेल अवीव या शहरातील नेतान्याहू यांच्या कार्यालयालच लक्ष्य केलं आहे. यासह इराणने इस्रायलच्या वायूसेना कमांडरच्या कार्यालयावरही क्षेपणास्त्र डागण्यात आले आहे. या हल्ल्यानंतर आता सगळीकडेच खळबळ उडाली आहे. बेंजामीन नेतान्याहू सध्या कोणत्या स्थितीत आहे, याबाबत सध्यातरी अस्पष्टता आहे, असे IRGC ने सांगितलेे आहे.
हल्ला झालेलाच नाही
इराणचे सर्वोच्च नेते अयातुल्लाह अली खामेनेई यांचा या युद्धात मृत्यू झाल्यानंतर इराणने हा हल्ला केला आहे. परंतु इस्रायलचे पंतप्रधान बिन्यामीन नेतान्याहू यांच्या कार्यालयावर हल्लाच झालेला नाही, असे इस्रायलकडून सांगण्यात आले आहे.
दरम्यान, इराणने आपले शस्त्र टाकून द्यावेत, असा इशारा अमेरिकेने दिलेल आहे. सोबतच इराणने युद्धातून माघार घेतल्यास आम्ही त्यांना सुरक्षेची हमी देऊ, असे आश्वासनही अमेरिकेने दिले आहे. त्यामुळे आता भविष्यात नेमके काय काय होणार? याकडे संपूर्ण जगाचे लक्ष लागले आहे. सध्यातरी भारतात सोने आणि चांदीचा भाव वाढताना दिसत आहे. इंधनाच्या कमितीतही वाढ होण्याची शक्यता व्यक्त केली जात आहे.
