China-Pakistan : पैसे नाहीत मग विमानं पण मिळणार नाहीत, चीनने पाकिस्तानला दिला झटका
China-Pakistan : पाकिस्तान चीनकडून पाचव्या पिढीची J-35 स्टेल्थ विमानं खरेदी करणार असं बोललं जात होतं. जर, पाकिस्तानला J-10CE चे पैसे देणे परवडत नाही, मग पाचव्या पिढीची विमान विकत घेणं कसं जमणार?.
चीन आणि पाकिस्तानमध्ये घट्ट मैत्री आहे. भारत विरोध हे सुद्धा यांची मैत्री दृढ होण्यामागचं एक कारण आहे. चीन पाकिस्तानला नेहमी मदत करत असतो. आज पाकिस्तानी सैन्याकडे जी शस्त्रास्त्र आहेत, त्यात चिनी शस्त्रांचा वाटा मोठा आहे. ऑपरेशन सिंदूरच्यावेळी सुद्धा हे दिसलं होतं. पण आता चीनने पाकिस्तानला झटका दिला आहे. पाकिस्तानने चीनकडून J-10CE फायटर विमानं विकत घेतली. पण आता या विमानांमुळे पाकिस्तानची अडचणी वाढली आहे. भारताच्या राफेल फायटर जेट्सचा सामना करण्यासाठी पाकिस्तानने चीनकडून ही विमानं विकत घेतली होती. पण आर्थिक संकटात अडकलेल्या पाकिस्तानकडे आता या विमान खरेदी व्यवहाराचे द्यायला पैसे नाहीत. म्हणून चीनने 16 J-10CE विमानांची डिलीवरी थांबवली आहे.
मिळालेल्या माहितीनुसार, पाकिस्तानने चीनकडून एकूण 36 J-10CE फायटर विमानं खरेदीचा व्यवहार केलेला. राफेलच्या आव्हानाचा सामना करण्यासाठी पाकिस्तानने आपल्या वायू दलात या विमानांचा समावेश केला. चीनकडून J-10CE हे राफेलच्या तोडीचं विमान असल्याचा दावा केला जातो. दोन्ही विमानांची क्षमता खूप वेगळी आहे. करारानुसार चीनकडून पाकिस्तानला आतापर्यंत 20 J-10CE विमानं मिळाली आहेत. सुरुवातीची डिलीवरी चिनी बँका आणि आर्थिक संस्थांकडून लोन घेऊन शक्य झाली होती. उर्वरित 16 विमानांचे पैसे पाकिस्तानला देता आलेले नाहीत.
दक्षिण आशियात हवाई शक्तीची स्पर्धा सुरु
पाकिस्तानची परकीय गंगाजळी घटली आहे. वाढतं परदेशी कर्ज आणि IMF च्या कठोर अटी यामुळे पाकिस्तान वेळेवर पेमेंट देऊ शकत नाहीय. म्हणून चीनने उर्वरित विमानांची डिलीवरी सध्या रोखली आहे. चीनच्या या निर्णयाने पाकिस्तानी एअर फोर्सला मोठा झटका बसू शकतो. J-10CE स्क्वाड्रन्स पूर्ण क्षमतेने तैनात केली जाणार आहेत. दक्षिण आशियात हवाई शक्तीची स्पर्धा सुरु झाली आहे.
पाचव्या पिढीची विमान विकत घेणं कसं जमणार?
पाकिस्तान चीनकडून पाचव्या पिढीची J-35 स्टेल्थ विमानं खरेदी करणार असं बोललं जात होतं. जर, पाकिस्तानला J-10CE चे पैसे देणे परवडत नाही, मग पाचव्या पिढीची विमान विकत घेणं कसं जमणार?. J-10CE चीनचं 4.5 जनरेशनच विमान आहे. यात AESA रडार, आधुनिक एवियोनिक्स आणि लांब पल्ल्याचं PL-15 एयर-टू-एयर मिसाइल वाहून नेण्याची क्षमता आहे.
