Makeup Tips: फाउंडेशनसोबत नेमकं काय लावायचं? वाचा ग्लोइंग लुकचं सीक्रेट!

नवरात्रीच्या गरब्यापासून दिवाळीच्या पार्टीपर्यंत, या सणासुदीत प्रत्येकाला आपला मेकअप परफेक्ट आणि चेहऱ्यावर नॅचरल ग्लो हवा असतो. मात्र महागडे मेकअप प्रोडक्ट्स वापरूनही मेकअपनंतर चेहरा निस्तेज किंवा कोरडा दिसत असेल, तर फाउंडेशन बदलण्याआधी मेकअपची बेस तयारी योग्य आहे का, हे पाहणे गरजेचे आहे. त्वचेला योग्य प्रकारे मॉइश्चराइज करणे, प्राइमरचा वापर करणे आणि फाउंडेशनसोबत काही खास प्रोडक्ट्स वापरणे यामुळे मेकअपला अधिक फ्रेश आणि ग्लोइंग फिनिश मिळू शकते. मग फाउंडेशनसोबत नेमकं काय वापरायचं आणि चेहऱ्यावर हवा तसा ग्लो कसा मिळवायचा? जाणून घ्या या सोप्या मेकअप ट्रिक्स, ज्या यंदाच्या नवरात्रीपासून दिवाळीपर्यंत तुमचा लुक अधिक खास बनवू शकतात.

आधी त्वचेला करा मॉइश्चराइज

फाउंडेशन लावण्यापूर्वी चेहरा फेस वॉशने स्वच्छ करून त्वचेला चांगले मॉइश्चराइज करणे महत्त्वाचे आहे. त्वचा कोरडी असल्यास फाउंडेशन पॅची दिसू शकते आणि मेकअपचा बेसही व्यवस्थित बसत नाही. त्यामुळे मेकअप करण्यापूर्वी त्वचेच्या प्रकारानुसार योग्य मॉइश्चरायझर वापरा. मॉइश्चरायझर त्वचेला हायड्रेट ठेवण्यास मदत करतो आणि त्यामुळे फाउंडेशन अधिक सहजपणे ब्लेंड करता येते.

प्राइमर वापरायला विसरू नका

मेकअपच्या आधी प्राइमर लावल्याने त्वचेवर एकसारखा बेस तयार होण्यास मदत होते. यामुळे फाउंडेशन थेट त्वचेवर जड दिसण्याऐवजी अधिक स्मूद पद्धतीने बसू शकते. ग्लोइंग लुक हवा असल्यास ड्यूई किंवा इल्यूमिनेटिंग प्रकारचा प्राइमर वापरता येतो. मात्र प्राइमर निवडताना आपल्या त्वचेचा प्रकार लक्षात घेणे महत्त्वाचे आहे.

फाउंडेशनसोबत स्ट्रोब क्रीम

चेहऱ्यावर ग्लॉसी आणि शाइनी फिनिश हवी असेल, तर फाउंडेशनसोबत स्ट्रोब क्रीमचा वापर करता येतो. यासाठी हाताच्या मागील बाजूस थोडे फाउंडेशन घेऊन त्यात अगदी कमी प्रमाणात स्ट्रोब क्रीम मिसळा. हे मिश्रण चेहऱ्यावर लावून स्पंज किंवा ब्रशच्या मदतीने व्यवस्थित ब्लेंड करा. स्ट्रोब क्रीम जास्त प्रमाणात वापरण्याऐवजी सुरुवातीला कमी प्रमाणात वापरल्यास अधिक नैसर्गिक ग्लो मिळू शकतो.

मेकअप फिक्सरचा योग्य वापर

मेकअप फिक्सरचा वापर केवळ मेकअपच्या शेवटीच करायचा असतो असे नाही. मेकअपच्या वेगवेगळ्या टप्प्यांवर सेटिंग स्प्रेचा हलका वापर केल्याने बेस अधिक फ्रेश दिसण्यास मदत होऊ शकते. मात्र चेहऱ्यावर स्प्रे करताना तो खूप जवळून किंवा जास्त प्रमाणात वापरू नये. उत्पादनाच्या सूचनांनुसार त्याचा वापर करणे योग्य ठरते.

लिक्विड हायलायटर ठरेल उपयोगी

चेहऱ्यावर नॅचरल चमक आणण्यासाठी लिक्विड हायलायटरचाही वापर करता येतो. चीक बोन्स, नोझ ब्रिज आणि कपाळाच्या काही भागांवर अगदी थोड्या प्रमाणात हायलायटर लावता येतो. तो व्यवस्थित ब्लेंड केल्यास चेहऱ्यावर प्रकाश पडल्यावर हलकी चमक दिसते. मात्र हायलायटरचे प्रमाण जास्त झाल्यास मेकअप अतिशय चमकदार दिसू शकतो, त्यामुळे कमी प्रमाणात वापरणे योग्य.