बीडच्या मस्साजोग पोटनिवडणुकीचा निकाल जाहीर; संतोष देशमुखांच्या पत्नीचा पराभव, कुणी मारली बाजी?

बीड जिल्ह्याच्या केज तालुक्यातील अत्यंत चर्चेत असलेल्या मस्साजोग ग्रामपंचायतीच्या सरपंच पदाचा निकाल अखेर जाहीर झाला आहे. गेल्या अनेक दिवसांपासून संपूर्ण जिल्ह्याचे लक्ष लागून असलेल्या या पोटनिवडणुकीत मोठा उलटफेर पाहायला मिळाला. दिवंगत सरपंच संतोष देशमुख यांच्या पत्नी अश्विनी संतोष देशमुख यांचा पराभव झाला आहे. तर स्वरूपानंद देशमुख यांनी ९२ मतांच्या फरकाने बाजी मारत दणदणीत विजय मिळवला आहे.

हत्येच्या सावटाखाली निवडणूक

मस्साजोगचे तत्कालीन सरपंच संतोष देशमुख यांची ९ डिसेंबर २०२४ रोजी निर्घृण हत्या करण्यात आली होती. या धक्कादायक घटनेमुळे हे सरपंचपद रिक्त झाले होते. संतोष अण्णांच्या निधनामुळे गावात निर्माण झालेली पोकळी आणि त्यांच्या अपूर्ण स्वप्नांचा विचार करून ही निवडणूक बिनविरोध व्हावी, अशी मागणी ग्रामस्थांच्या एका गटाकडून आणि देशमुख कुटुंबाकडून करण्यात आली होती. यानंतर संतोष देशमुख यांच्या पत्नी अश्विनी देशमुख या मस्साजोग ग्रामपंचायतीच्या सरपंचपदाच्या रिंगणात उतरल्या होत्या. त्यांना बिनविरोध संधी देऊन संतोष अण्णांना खरी श्रद्धांजली द्यावी, अशी इच्छा व्यक्त करण्यात येत होती.

मात्र स्वरूपानंद देशमुख यांनी शेवटपर्यंत अर्ज मागे घेण्यास नकार दिला. अखेर आज जाहीर झालेल्या निकालात स्वरूपानंद देशमुख यांनी बाजी मारली. या निकालाने राजकीय वर्तुळात मोठी खळबळ उडाली आहे.  त्यांनी आपली ताकद वाढवत विजयावर शिक्कामोर्तब केले. दुसरीकडे, संतोष देशमुख यांच्या निधनानंतर ही निवडणूक होत असल्याने अश्विनी देशमुख यांना मोठी सहानुभूती मिळेल, अशी शक्यता वर्तवली जात होती; मात्र मतदारांनी विकासाला किंवा अन्य मुद्द्यांना प्राधान्य दिल्याने ही सहानुभूती फॅक्टर चालला नसल्याचे स्पष्ट झाले आहे.

यंदा मतदानाच्या टक्केवारीत १० टक्क्यांनी वाढ 

या निवडणुकीसाठी ७ एप्रिल २०२६ पासून उमेदवारी अर्ज भरण्यास सुरुवात झाली होती. जिल्ह्यातील एकूण ८८ रिक्त जागांच्या पोटनिवडणुकीचा हा भाग होता. २८ एप्रिल रोजी मतदान प्रक्रिया पार पडली. मस्साजोगमध्ये एकूण २,२८४ मतदार आहेत. यंदा गावात विक्रमी मतदान पाहायला मिळाले. यंदाच्या या निवडणुकीत तब्बल ८४ टक्के मतदान झाले. गेल्यावर्षीच्या तुलनेत यंदा मतदानाच्या टक्केवारीत १० टक्क्यांनी वाढ नोंदवण्यात आली. सकाळच्या सत्रात मतदानाचा वेग काहीसा मंद होता, मात्र दुपारनंतर मतदारांनी मोठ्या रांगा लावल्या. त्यामुळे मतदानाची टक्केवारी प्रचंड वाढली.

मस्साजोग सरपंचपदाच्या पोटनिवडणुकीच्या पार्श्वभूमीवर गावात किरकोळ गोंधळ वगळता संपूर्ण मतदान आणि मतमोजणी प्रक्रिया शांततेत पार पडली. प्रशासनाकडून मोठा पोलीस बंदोबस्त तैनात करण्यात आला होता. स्वरूपानंद देशमुख यांच्या विजयानंतर त्यांच्या समर्थकांनी मोठा जल्लोष साजरा केला आहे.