माझा राम गेला…आईच्या हंबरड्याने मस्साजोगमध्ये स्मशान शांतता, सुप्रिया सुळे भावूक
Massajog Sarpanch Santosh Deshmukh Case : मस्साजोगचे सरपंच संतोष देशमुख यांची हत्या होऊन अडीच महिने उलटले. पण एक आरोपी फरार तर एका आरोपीला व्हीआयपी ट्रीटमेंट, असा आरोप करण्यात येत आहे.
माझा राम गेला, एकटा लक्ष्मण कुठवर धावणार? असा हंबरडा संतोष देशमुख यांच्या आईने फोडताच उपस्थित सर्वच जण गहिवरून गेले. राष्ट्रवादी शरदचंद्र पवार पक्षाच्या खासदार सुप्रिया सुळे सुद्धा भावूक झाल्या. त्यांनी देशमुख यांच्या आईला आधार देण्याचा प्रयत्न केला. यावेळी ग्रामस्थ संतप्त झाले होते. आरोपीला देण्यात येणाऱ्या व्हीआयपी ट्रीटमेंट, एक आरोपी फरार, तर संथगतीने होणाऱ्या तपासावर गावकऱ्यांनी तोंडसुख घेतले. त्यांच्या भावनांना वाट मोकळी करुन दिली.
माझं लेकरू कुठं शोधू?
माझं लेकरू कुठं शोधू? मारेकऱ्यांना लेकरं, आई-वडिल नाहीत का? एकटं माणूस पाहून मारलं, त्यांना काहीच वाटलं नाही का? असा सवाल करत संतोष देशमुख यांच्या आईने हंबरडा फोडला. त्यांच्या आक्रोशाने सर्वांचे मन हेलावले. ज्या दिवशी हत्या झाली, त्यादिवशी मी त्याची वाट पाहत होते. स्वयंपाक केलेला होता. त्याला फोन केला. पाचच रिंग वाजल्या आणि नंतर फोन बंद झाला, असे सांगतानाच त्या माऊलीचा कंठ दाटून आला, घळाघळा अश्रू आले.
माझ्या मुलाचा चेहरा पण पाहु दिला नाही
माझ्या मुलाचा चेहरा सुद्धा पाहु दिला नाही, असे संतोष देशमुख यांच्या आई म्हणाल्या. पीएसआय राजेश पाटील हा खरा आरोपी असल्याचा आरोप ग्रामस्थांनी केला. आरोपींनी वॉचमनला मारहाण केली. अशोक मोहितेला आरोपींच्या मित्रांनी मारहाण केली,असे धनंजय देशमुख म्हणाले. तर पीएसआय पाटील यांच्यावर ॲट्रॉसिटीचा गुन्हा दाखल करण्याची मागणी ग्रामस्थांनी केली.
मी तुमच्यासाठी लढेन
देशमुख कुटुंबाला 69 दिवसांपासून न्याय मिळाला नाही. माणुसकीच्या नात्याने सुप्रिया सुळे हा लढा लढणार आहे, असे सुप्रिया सुळे यांनी जाहीर केले. आईचं-बहिणीचं दुःख समजू शकते. मुख्यमंत्री देवेंद्र फडणवीस हे सुसंस्कृत आहेत. त्यांच्याकडून लवकर न्यायाची अपेक्षा होती. त्यांनी वरतून एक मोठा सिग्नल द्यायला पाहिजे होते. हे राज्य छत्रपती शिवाजी महाराजांच्या संस्काराने चालेल, हे अपेक्षित आहे. मी न्यायासाठी मुख्यमंत्र्यांकडे पदर पसरवले, असे सुप्रिया सुळे म्हणाल्या.
अमित शाह यांच्याकडे मागणी
केंद्रीय गृहमंत्री अमित शाह यांच्याकडे सरपंच संतोष देशमुख यांना न्याय मिळावा यासाठी मागणी केल्याची माहिती सुप्रिया सुळे यांनी दिली. खासदार बजरंग सोनवणे आणि आपण अमित शाह यांची भेट घेतल्याचे सुळे यांनी पत्रकार परिषदेत माहिती दिली. आरोपींना फाशीची शिक्षा झाल्याशिवाय स्वस्थ बसणार नसल्याचे सोनवणे म्हणाले. या लोकांची सत्तेची मस्ती उतरल्याशिवाय स्वस्थ बसणार नाही. येथील गुंडगिरी थांबलीच पाहिजे, असे त्या म्हणाल्या.
