डाव्या हातात हिरव्या बांगड्या, उजव्या हातात काळा दोरा… ती कोण होती? शिर नसलेलं धड… AI इमेजद्वारे शोध सुरू
बुलढाणा जिल्ह्यातील शिरविहीन मृतदेहाचे गूढ ४५ दिवसांनंतरही कायम आहे. जळगाव जामोद येथे सापडलेल्या तरुणीच्या धडाची ओळख पटवण्यासाठी पोलिसांनी AI इमेज तयार केली आहे. डाव्या हातात हिरव्या बांगड्या, उजव्या हातात काळा दोरा अशा वर्णनाची ही तरुणी कोण, याचा शोध सुरू आहे.
बुलढाणा जिल्हा सध्या एका प्रकरणाने अधिक गाजत आहे. एका तरुणीचा मृतदेह सापडल्याने खळबळ उडाली आहे. धक्कादायक बाब म्हणजे या मुलीचा मृतदेह सापडला. पण फक्त धड सापडलं. तिचं शिर सापडलंच नाही. डोकंच न सापडल्याने या तरुणीची ओळख पटू शकलेली नाही. त्यामुळे ही तरुणी कोण आहे? तिचा खून कोणी केला? असे सवाल प्रत्येकजण करत आहे. तर या तरुणीचा शोध घेण्यासाठी आता एआयच्या मदतीने तिच्या चेहऱ्याची इमेज तयार करण्यात आली आहे. त्यावरून या तरुणीचा शोध घेतला जात आहे. तसेच या तरुणीची माहिती देणाऱ्यासाठी पोलिसांनी रोख रकमेचं बक्षीसही जाहीर केलं आहे.
बुलढाणा जिल्ह्यातील जळगाव जामोद तालुक्यातल्या राजुरा शिवारातील शिरविरहित बनवट हत्याकांड प्रकरणातील मृतक मुलीची ओळख अद्यापही पटलेली नाही. आज या प्रकरणाला जवळपास 45 दिवस उलटून गेलें तरीही मृत मुलगी नेमकी कोण? कुठली? याचा तपास लावण्यास बुलढाणा पोलिसांना अपयश आले आहे. या सगळ्या बाबींचा आढावा घेण्यासाठी राज्याचे पोलीस महासंचालक सदानंद दाते काल अमरावती दौऱ्यावर आले होते. मृत मुलीची ओळख पटवण्यासाठी पोलिसांनी घटनास्थळावर सापडलेल्या मृतदेहावरून एक एआय इमेज तयार केली आहे आणि या एआय इमेजच्या माध्यमातून शोध घेणे सुरू आहे.
आशा वर्करला सूचना
जिल्ह्यातील सर्व पोलीस स्टेशन पोलीस पाटील आशा वर्कर या सगळ्यांना पोलिसांनी शोध घेण्याची सूचना सुद्धा केली आहे. तसेच माहिती देणाऱ्यास 50 हजार रुपयांचा बक्षीस सुद्धा देण्याचं जाहीर केलेलं आहे. मात्र 45 दिवसानंतरही अद्याप मृत मुलगी कोण? याचा शोध लागलेला नाही. त्यामुळे बुलढाणा पोलिसांच्या तपासावर प्रश्नचिन्ह निर्माण होते आहे.
काय घडलं होतं?
जळगाव जामोद पोलीस ठाण्याच्या हद्दीत 26 एप्रिल रोजी उघडकीस आलेल्या मुलीचा हत्याकांडाने आता थेट राज्याच्या गृहविभागाचे लक्ष वेधले आहे. या प्रकरणात सुरुवातीपासूनच तपासावर गंभीर प्रश्नचिन्ह उपस्थित झाले. मृतदेहाची ओळख पटलेली नसताना तपासाचा गोंधळ, नंतर कथित मृत व्यक्तीच जिवंत असल्याचे समोर येणे आणि बनावट तपासाचे आरोप यामुळे बुलढाणा पोलिसांची विश्वासार्हता महाराष्ट्रासह मध्य प्रदेशातही चर्चेचा विषय ठरली. तब्बल नऊ अधिकारी आणि 26 अंमलदारांची टीम तपासात असतानाही मृत महिलेची ओळख अद्याप पटलेली नाही, ही बाब धक्कादायक मानली जात आहे.
तरुणीचं वर्णन आलं समोर
मृत तरुणी अंदाजे 20 ते 30 वर्षाची आहे. गव्हाळ सावळ्या रंगाची आहे. या तरुणीच्या डाव्या हातात हिरव्या बांगड्या, उजव्या हातात काळा दोरा होता. तिने गुलाबी रंगाची बो असलेली फ्लॅट सँडल घातलेली होती. या मुलीची ओळख पटवून देणाऱ्यास 50 हजार रुपये रोख रक्कम बक्षीस देण्यात येणार आहे. तसेच माहिती देणाऱ्याची माहिती गुप्त ठेवली जाणार असल्याचं पोलिसांनी सांगितलं.
