Buldana Doctor | बुलडाण्यात 2 बोगस डॉक्टर ताब्यात; आरोग्य विभागासह पोलिसांची संयुक्तिक कारवाई

बुलडाण्यात 2 बोगस डॉक्टर ताब्यात

Image Credit source: t v 9

बुलडाणा : शहरात प्रॅक्टिस करणाऱ्या दोन बोगस डॉक्टरांना आरोग्य विभागासह (Health Department) पोलिसांनी छापा मारत ताब्यात घेतले आहे. हे डॉक्टर बुलडाणा शहरातील मोठ्या देवी मंदिर परिसरात (Devi Mandir Premises) दवाखाना चालवत होते. कपिल कुमार आणि विनोद शर्मा अशी ताब्यात घेतलेल्या डॉक्टरांची नावे आहेत. बुलडाणा जिल्ह्यात सध्या बोगस डॉक्टरांचा सुळसुळाट पाहायला मिळत आहे. अणे हे डॉक्टर रुग्णांच्या जीवाशी खेळत आहेत. मात्र प्रशासन यावर कारवाई करताना दिसत नाही. बुलडाणा शहरातील देवी परिसरात पकडलेले हे दोन्ही बोगस डॉक्टर हरियाणा (Haryana) राज्यातील कर्नाल येथील आहेत. गुप्त माहितीच्या आधारे पकडण्यात आलेल्या या डॉक्टरांकडे पदवी प्रमाणपत्र आणि मेडिकल असोसिएशनचे प्रमाणपत्र देखील नाही.

आरोग्य तालुका अधिकाऱ्यांची तक्रार

याबाबत बुलडाणा पोलिसात तालुका आरोग्य अधिकारी व जिल्हा आयुष अधिकारी यांनी तक्रार दिली आहे. हे डॉक्टर अगदी साध्या आजारापासून ते लैंगिक समस्या निवारण करत असल्याचं समोर आलंय. तालुका आरोग्य अधिकारी डॉ. महेंद्र सरपाते यांनी ही माहिती दिलीय. ग्रामीण भागात असे बोगस डॉक्टर आपली दुकानदारी थाटतात. बहुधा असे बोगस डॉक्टर आधी एखाद्या डॉक्टरकडं काम करतात. डॉक्टरकडून थोडीफार माहिती घेतात. ती झाली की, आपली स्वत:ची दुकानदारी थाटतात. अर्धवट माहितीच्या आधारे रुग्णांवर उपचार करतात. त्यामुळं हा एकप्रकारे रुग्णांच्या जीवाशी खेळच असतो.

दोन्ही बोगस डॉक्टर हरियाणाचे

विशेष म्हणजे अटक करण्यात आलेले दोन्ही डॉक्टर हरियाणाचे आहेत. तिकडं यांनी कुठतरी एखाद्या डॉक्टरकडं काम केलं असावं. थोडीफार वैद्यकीय क्षेत्रातल्या मिळालेल्या माहितीच्या आधारे त्यांनी आपली दुकानं थाटली असावी, असा अंदाज व्यक्त करण्यात येत आहे. या डॉक्टरांच्या गेल्या काही दिवसांपासून तक्रारी होत्या. त्यांच्यावर आरोग्य विभागाची पाळत होती. कागदपत्र तपासले असता त्यांच्याकडं काहीच सापडले नाही. त्यामुळं ही कारवाई करण्यात आली.