…म्हणून काही महिला मोठं कुंकू अन् मंगळसूत्र घालतात, काँग्रेसच्या माजी आमदारांच्या वक्तव्याने एकच खळबळ

Rahul Bondre Offensive Statement: आता निवडणुका नसल्याने विविध पक्षातील पक्ष प्रवेशांनाही जणू ब्रेक लागला आहे. पण दिल्लीपासून ते गल्लीपासून काही नेत्यांना गळ्याला लावण्याची जोरदार तयारी सुरू आहे. ऑपरेशन टायगर, ऑपरेशन तुतारी असे शब्दप्रयोग राजकारणात धडकी भरवत आहेत. त्यातच बुलढाणा जिल्ह्यातील चिखली मतदारसंघातील माजी आमदार राहुल बोंद्रे यांची शिंदे सेनेचे आमदार संजय गायकवाड यांनी भेट घेतली. या भेटीवरून चर्चा रंगत असतानाच राहुल बोंद्रे यांनी वाद अंगावर ओढावून घेतला. काँग्रेस सोडून शिवसेनेत जाणार का असा सवाल त्यांना विचारण्यात आला. त्यावर बोलताना त्यांनी हे वादग्रस्त वक्तव्य केले.

महिलांविषयी वादग्रस्त वक्तव्य

बुलढाण्याचे आमदार संजय गायकवाड यांनी काँग्रेसचे माजी आमदार राहुल बोंद्रे यांची भेट घेतली. त्यानंतर बोंद्रे यांनी पत्रकार परिषद घेतली. त्यावेळी त्यांना काँग्रेस सोडून शिवसेनेत प्रवेश करणार का असा सवाल विचारण्यात आला. या प्रश्नाला उत्तर देताना त्यांनी विचित्र उदाहरणं दिले. जी कुणी महिला असते. जीला दाखवावं लागतं की, मी पतिव्रता आहे. ती मोठं कुंकू लावते आणि मोठे मंगळसूत्र घालते, असे अजब उत्तर त्यांनी या पक्ष बदलाच्या प्रश्नावर दिले. बोंद्रे यांचं उदाहरण तर चुकलंच पण त्यांची जीभही घसरली. त्यातून दुसराच अर्थ ध्वनीत होऊ लागला.

भाजपवर जोरदार टीका

काँग्रेसचे माजी आमदार राहुल बोंद्रे यांनी यावेळी भाजपवरही जोरदार टीका केली. भाजपवाल्यांची देशभरात अशीच पॉलिसी आहे. ज्यांना पक्षात आणायचे आहे, त्यांच्याविषयी चर्चा करत राहायची. कार्यकर्त्यांवर दबाव वाढवायचा. त्यांचा भाजपमध्ये प्रवेश करून घ्यायचा. ते एक सुनियोजीत चाल खेळतात. त्यानुसार ते चर्चा करतात. मी एकदाच सांगितले आहे. मला परत परत सांगण्याची मला आवश्यकता वाटत नाही. जी कोणी महिला असते. तिला दाखवावं लागतं ती किती पतीव्रता आहे. ती मोठं कुंकू लावते. मोठं मंगळसूत्र घालते. प्रत्येकाला तशी आवश्यकता नसते, असे उदाहरण राहुल बोंद्रे यांनी दिले. बोंद्रे यांच्या वक्तव्याने आता खळबळ उडाली आहे.

महिलांचे जोडो मारो आंदोलन

राहुल बोंद्रे यांच्या या वक्तव्याने एकच खळबळ उडाली. त्यानंतर महिलांनी त्यावर तीव्र आक्षेप घेतला. बोंद्रे यांच्या बॅनरला चिखलीतील शिवाजी चौकात जोडे मारो आंदोलन करण्यात आले. यावेळी महिलांना त्यांच्याविरोधात घोषणाबाजी सुद्धा केली. त्यांनी बोंद्रेंच्या बॅनरला जोडे मारले आणि विरोधात घोषणा दिल्या.