Baramati By Election : मोठी बातमी, सुनेत्रा पवार यांच्या विजयाच्या मार्गातील मोठा अडथळा दूर

बारामती विधानसभा निवडणुकीत सुनेत्रा पवार यांच्या विजयाच्या मार्गातील मोठा अडथळा दूर झाला आहे. सुनेत्रा पवार यांच्यासमोर काँग्रेसने उमेदवार दिला होता. काँग्रेसने आपला उमेदवार मागे घ्यावा यासाठी आज सकाळपासून जोरदार प्रयत्न सुरु आहेत. आमदार रोहित पवार यांनी आज सकाळी काँग्रेस प्रदेशाध्यक्ष हर्षवर्धन सपकाळी यांची भेट घेतली. उमेदवारी मागे घ्यावी यासाठी त्यांना विनंती केली. त्याशिवाय शरद पवार, सुप्रिया सुळे यांनी देखील अशीच अपेक्षा व्यक्त केली. आता त्यांच्या शिष्टाईला यश येताना दिसत आहे. काँग्रेस आपला उमेदवार मागे घेणार आहे.

काँग्रेस आपला उमेदवारी अर्ज मागे घेणार अशी रमेश चेन्नीथला यांनी टीव्ही 9 मराठीला माहिती दिली आहे. रमेश चेन्नीथला हे काँग्रेसचे महाराष्ट्र प्रभारी आहेत. बारामती विधानसभा पोटनिवडणुकीसाठी काँग्रेसने आकाश मोरे यांना उमेदवारी दिली होती. आकाश मोरे यांची उमेदवारी काँग्रेस मागे घेणार असल्याने सुनेत्रा पवार यांचा विजयाचा मार्ग सुकर होणार आहे. पण निवडणुकीला बिनविरोध म्हणता येणार नाही. कारण अपक्ष उमेदवार अजूनही निवडणूक रिंगणात आहेत.

आकाश मोरे काय म्हणाले?

अजित पवार विमान अपघात प्रकरणात राज्य सरकारने गुन्हा दाखल केल्यास उमेदवारी मागे घेऊ असं काँग्रेस प्रदेशाध्यक्ष हर्षवर्धन सपकाळ म्हणाले. बारामती निवडणूक लढवणारे काँग्रेसचे उमेदवार आकाश मोरे टीव्ही 9 मराठीशी बोलले. “मी कालपासून लोकांच्या भेटीगाठी सुरु केलेल्या आहेत. ग्रामीण भागात उत्साहाचं वातावरण आहे. निवडणूक काँग्रेस लढतेय त्याचा आनंद आहे. आतापर्यंत तरी मी उमेदवार आहे” असं आकाश मोरे म्हणाले.

दादांचं विमान अपघातात निधन झाल्यामुळे ही निवडणूक

मुख्यमंत्री देवेंद्र फडणवीस यांनी काही दिवसांपूर्वीच ही निवडणूक बिनविरोध व्हावी अशी इच्छा व्यक्त केली होती. दिवंगत उपमुख्यमंत्री अजित पवार यांचं अकाली विमान अपघातात निधन झाल्यामुळे ही निवडणूक होत आहे. त्यांच्या पत्नी सुनेत्रा पवार या राष्ट्रवादी काँग्रेस महायुतीच्या उमेदवार आहेत. काँग्रेसने आपली उमेदवारी मागे घ्यावी यासाठी राष्ट्रवादी काँग्रेसच्या आमदारांनी आज काँग्रेस प्रदेशाध्यक्ष हर्षवर्धन सपकाळ यांची भेट घेतली.