Eknath Shinde: मागच्या दाराने मुख्यमंत्री झालात… 2019 च्या सत्तांतराचा मुद्दा उपस्थित करत एकनाथ शिंदेंची उद्धव ठाकरेंवर टीका; म्हणाले…

आज गोरेगावच्या नेस्को सेंटरमध्ये एकनाथ शिंदेच्या शिवसेनेचा दसरा मेळावा घेण्यात आला. या सोहळ्यसाठी शिवसैनिकांनी मोठ्या प्रमाणात गर्दी केली होती. यावेळी महाराष्ट्राचे उपमुख्यमंत्री एकनाथ शिंदे यांनी शिवसैनिकांशी संवाद साधला आहे. त्यांनी भाषणातून विरोधकांवर मोठा निशाणा साधला आहे. दुष्काळग्रस्तांच्या मदतीवरून एकनाथ शिंदेंनी उद्धव ठाकरेंवर टीका केली आहे.

यावेळी बोलताना एकनाथ शिंदे म्हणाले की, आज शिवसेनेला ६० वर्ष होत आहे. ही परंपरा आपण जपत आहोत. शेतकरी संकटात आहे. महाराष्ट्र दुष्काळाच्या सावटाखाली आहे. ही वेळ शेतकऱ्यांसाठी धावून जायची आहे. शेतकऱ्यांची दिवाळी आम्ही काळी होऊ देणार नाही. शेतकरी आज अश्रू ढाळत आहे. शेतकऱ्यांच्या तोंडाचा घास गेला. आम्ही सर्वांच्या बांधावर गेलो. आम्ही भाषण देणारे नाही. तर राशन देणारे आहोत. ही वेळ आरोप-प्रत्यारोपांची नाही. मी शेतकऱ्याचा मुलगा आहे. मी त्यांचं दु:ख समजू शकतो.

ते म्हणाले की, आम्ही बांधावर गेलो तेव्हा शेतकरी रडत होते. मी मुख्यमंत्री असताना निकष बाजुला ठेऊन शेतकऱ्यांना मदत केली होती. शेतकऱ्यांच्या मुलांच्या शिक्षणाची लग्नाची जबाबदारी शिवसेनेची आहे. माझ्यावर आरोप करत आहेत. पण मी आरोपांनी उत्तर कामातून देईन. त्यांचा एकही दिवस मला शिव्या दिल्याशिवाय जात नाही. शेतकरी संकटात असताना मोर्चे काढत आहेत. अनेकांनी पश्न उपस्थित केला, ५ हजारांनी काय होणार. पण ५ हजार ही तातडीची मदत आहे.

एकनाथ शिंदे म्हणाले की, कर्जमाफीसाठी ३२ हजार कोटींचं नियोजन केले आहे. आम्ही शेतकऱ्यांच्या पाठीशी आहोत. आम्ही शेतकऱ्यांसाठी मदत पाठवली आहे. तुम्ही कधी शेतकऱ्यांना बिस्किटचा पुडा तरी दिला का? शेतकऱ्यांची पिके करपून गेली आणि तुम्ही मोर्चे काढता. तुम्ही मागच्या दाराने निवडून मुख्यमंत्री झालात. सर्वात मोठी वोटचोरी २०१९ मध्ये झाली. जेव्हा तुम्ही भाजपच्या नावाने लढून आलात. नंतर महाविकास आघाडीसोबत सरकार स्थापन केला. हा मतदारांसोबत विश्वासघात आहे, असं म्हणत त्यांनी उद्धव ठाकरेंवर टीका केली आहे.