Big News | ब्रेस्ट कँसरचं भीषण चित्र, दर 6 मिनिटाला एका महिलेचा मृत्यू, महाराष्ट्र सरकारचं मोठं पाऊल, दर बुधवारी….
या आजारावर घरच्या घरी निदान करण्यासाठी टाटा हॉस्पिटलच्या माध्यमातून प्रशिक्षण देण्यात येणार आहे. ग्रामीण, शहरी भागात आशा वर्कर, महिला बचत गट, सामाजिक संस्थेच्या माध्यमातून याबाबत घरोघरी जाऊन जनजागृती करण्यात येणार आहे.
मुंबई : आज देशात 90 हजार महिला स्तन कर्करोग (Breast cancer) आजारामुळे मृत्यूमुखी पडत आहेत. दर सहा मिनिटाला एका महिलेचा मृत्यू या आजारामुळे होत आहे. पूर्वी हा आजार 50 ते 60 वर्ष वयोगटातील महिलांमध्ये आढळून येते होता. आज हा आजार 25 ते 40 वयोगटातील तरुण महिलामध्ये आढळत आहे, त्यामुळे या आजाराविरोधात लढण्यासाठी सर्वच स्तरांतील महिलांमध्ये जनजागृती निर्माण करणे आवश्यक आहे. राज्य शासानाच्या वतीने असे प्रयत्न सुरु आहेत. याचाच एक महत्त्वाचा भाग म्हणजे दर बधुवारी प्रत्येक शासकीय वैद्यकीय महाविद्यालयामध्ये दर बुधवारी स्तनाच्या कर्करोगाच्या निदान व उपचारासाठी समर्पित ओपीडी सुरू करण्यात करण्यात येणार आहे. ही ओपीडी दुपारी 12 ते 2 दरम्यान सुरू राहणार असून यावर उपचारासाठी कुठलेही पैसे लागणार नाहीत, अशी माहिती वैद्यकीय शिक्षण मंत्री गिरीश महाजन यांनी दिली.
मुंबईत भव्य रॅलीचं आयोजन
जागतिक महिला दिनाचे औचित्य साधून स्तन कर्करोग जनजागृती व उपचार भव्य रॅलीचे उद्घाटन वैद्यकीय शिक्षण मंत्री गिरीश महाजन यांच्या हस्ते आज काळा घोडा येथे झेंडा दाखवून करण्यात आले. ही रॅली काळा घोडा, लायन गेट, ओल्ड कस्टम ऑफिस, एशियाटिक लायब्ररी,जनरल पोस्ट ऑफिस ते सेंट जॉर्ज रुग्णालय इथपर्यंत काढण्यात आली. या रॅलीत २ हजारपेक्षा अधिक वैद्यकीय महाविद्यालयातील विद्यार्थी सहभागी झाले होते. रॅलीमध्ये के. जी. मित्तल आयुर्वेद महाविद्यालय यांच्याशी संलग्न 18 महाविद्यालयातील विद्यार्थी, विद्यार्थिनी, शिक्षक या रॅलीत सहभागी झाले होते. आजची बदलती जीवनशैली, व्यायामाचा अभाव पाहता महिलांमध्ये स्तन कर्करोग आजार वाढत असतांना दिसत आहे. यावर उपाययोजना करण्यासाठी स्तन कर्करोग जनजागृती व त्यावर उपचार ही काळाची गरज आहे, असे उद्गार वैद्यकीय शिक्षण, ग्रामविकास व क्रीडा व युवक कल्याण मंत्री गिरीश महाजन यांनी काढले.
आयुर्वेदिक महाविद्यालयांंकडून जागृती
वैद्यकीय शिक्षण विभाग आणि महाराष्ट्र आरोग्य विज्ञान विद्यापीठ, नाशिक यांच्या रौप्य महोत्सवी वर्षानिमित्त जागतिक महिला दिनी जनजागृती रॅलीचे आयोजन करण्यात आले होते. रॅलीला संबोधित करताना मंत्री गिरीश महाजन बोलत होते. जागतिक महिला दिनानिमित शुभेच्छा देवून ते पुढे म्हणाले की, आयुर्वेदिक महाविद्यालयाची याबाबत खूप मोठी जबाबदारी आहे. हा आजार चार स्टेपमध्ये आहे. या आजाराचे पहिल्या आणि दुसऱ्या स्टेपमध्ये निदान झाले तर उपचार होऊ शकतात. 3 ऱ्या व 4 स्तरावर यावर उपचार करने कठीणअसते.
घरी उपचारासाठी प्रशिक्षण
या आजारावर घरच्या घरी निदान करण्यासाठी टाटा हॉस्पिटलच्या माध्यमातून प्रशिक्षण देण्यात येणार आहे. ग्रामीण, शहरी भागात आशा वर्कर, महिला बचत गट, सामाजिक संस्थेच्या माध्यमातून याबाबत घरोघरी जाऊन जनजागृती करण्यात येणार आहे. या आजारावर उपचार करण्यासाठी शासनामार्फत प्रत्येक शासकीय वैद्यकीय महाविद्यालयामध्ये दर बुधवारी स्तनाच्या कर्करोगाच्या निदान व उपचारासाठी समर्पित ओपीडी सुरू करण्यात करण्यात येणार आहे. ही ओपीडी दुपारी 12 ते 2 दरम्यान सुरू राहणार असून यावर उपचारासाठी कुठलेही पैसे लागणार नाहीत, अशी माहिती त्यांनी यावेळी दिली. आजारावर मात करण्यासाठी व्यसनापासून दूर रहा व नियमितपणे व्यायाम, योगासन करा, असे आवाहनही मंत्री महाजन यांनी केले.