नांदेड शेतकरी मृत्यू प्रकरणात पोलिसांसमोर मोठं चॅलेंज, मुख्य आरोपी अजूनही फरार

नांदेडमधील  शेतकरी चंद्रकांत शिंदे यांच्या मृत्यूमुळे राज्.भरात मोठी खळबळ माजली असून हे प्रकरण चांगलंच चर्चेत आलं आहे. एका फायनान्स कंपनीच्या कार्यालयात शिंदे यांचा मृतदेह आढळल्याने सगळेच हादरले. चंद्रकांत यांच्या मृत्यूने कुटुंबाला मोठा धक्का बसला, त्यांच्यावर तर दु:खाचा डोंगरच कोसळला. दरम्यान फायनान्स कंपनीच्या कार्यालयात त्यांचा मृतदेह आढळल्यानंतर अपहरण आणि खुनाचा गुन्हा दाखल करण्यात आला होता. पोलिसांनी वेगान तपास करत तीन संशयितांना ताब्यात घेतलं होतं. आता याच प्रकरणात एक मोठी अपडेट समोर आली आहे

शिंदे यांच्या खून प्रकरणातील तीन आरोपींना तीन दिवसांची पोलीस कोठडी ठोठावण्यात आली आहे. तर मुख्य सूत्रधार असलेला केएफ फायनान्सचा संचालक अजूनही फरारच आहे. त्याचा कसून शोध घेण्यात येत असून पोलिसांची अनेक पथके त्याच्या मागावर आहेत.

कार्यालयात सापडला मृतदेह

शनिवारी नांदेडमधील हिंगोली गेट परिसरातील फायनान्स कंपनीच्या कार्यालयात शिंदे यांचा गळफास घेतलेल्या अवस्थेतील मृतदेह आढळला होता. मात्र आमच्या मुलाने आत्महत्या केली नाही तर हा खून आहे, असा आरोप कुटुंबियांनी केला. चंद्रकांत यांनी केवळ 7 हजारांचं कर्ज घेतलं होतं, मात्र त्यांच्याकडे 75 हजार रुपयांची मागणी केली जात होती, असा दावा नातेवाइकांनी केला आहे. तसेच त्यांच्या मृत्यूच्या दोन दिवस आधी त्यांना माळकौठा गावातून फायनान्स कंपनीच्या कर्मचाऱ्यांनी अपहरण केलं आणि नांदेडमधील कार्यालयात डांबून ठेवल्याचा आरोप नातेवाइकांनी केला.  त्यांना मारहाण करून त्यांची हत्या करण्यात आल्याचा आरोपही कुटुंबीयांनी केला आहे.  यानंतर वजिराबाद पोलीस ठाण्यात अपहरण आणि खुनाचा गुन्हा दाखल करण्यात आला.

आरोपींना तीन दिवसांची कोठडी

या प्रकरणाचा तपास करत असताना पोलिसांनी तपासाची चक्र वेगाने फिरवली. वजिराबाद पोलिसांनी खून आणि अपहरणाचा गुन्हा दाखल करून तीन आरोपींना अटक केली होती. त्याच तीन आरोपींना आज पोलिसांनी न्यायालयात हजर केलं. त्यावेळी न्यायालयाने तिन्ही आरोपींना तीन दिवसांची पोलिस कोठडी सुनावली.

आरोपी जयकुमार उर्फ शेरा गायकवाड,शेख अमीर शेख हुसेन या दोघांनी माळकौठा गावातून शेतकरी चंद्रकांत शिंदे यांचे अपहरण केलं होतं. इम्रान खान शहबाज खान याने वसुलीसाठी सक्ती केली असा आरोप आहे. या प्रकरणातील मुख्य सूत्रधार केएफ फायनान्सचा संचालक अजून फरार आहे. मुख्य आरोपीच्या शोधासाठी एलसीबीची सहा पथक आणि गुन्हे शाखेची दोन पथक ठीक ठिकाणी रवाना झाली आहेत.