मुलीच्या मैत्रिणीवरच नराधम बापाचा अत्याचार, पिडीत मुलीने उचलले टोकाचे पाऊल

भंडारा जिल्ह्यातील मोहदुरा गावातून एक अत्यंत संतापजनक आणि धक्कादायक घटना समोर आली आहे.शाळकरी अल्पवयीन मुलीवर तिच्याच मैत्रिणीच्या वडिलांनी लैंगिक अत्याचार केल्याचे उघड झाले. त्यानंतर या घटनेने तणावात असलेल्या पीडित मुलीने विषप्राशन केल्याची धक्कादायक माहिती समोर आली आहे. सध्या तिच्यावर जिल्हा सामान्य रुग्णालयात उपचार सुरू आहेत. या प्रकरणी आरोपी सोमा सालिक मेश्राम (वय ३७) याला पोलिसांनी अटक केली आहे.

भंडारा तालुक्यातील मोहदुरा गावात वर्ग मैत्रीणीच्या वडीलांनीच मुलीवर लैंगिक अत्याचार केल्याच्या प्रकारामुळे परिसरात संतापाचे वातावरण निर्माण झाले आहे. पीडित मुलगी ही आरोपीच्या मुलीसोबत एकाच वर्गात शिक्षण घेत आहेत. या दोघी एकमेकींच्या जवळच्या मैत्रिणी आहेत. गुरुवारी रात्री पीडित मुलगी मैत्रिणीकडे थांबली असताना आरोपी सोमा मेश्राम याने तिला दुचाकीवर फिरायला नेत असल्याचे सांगून स्वत: सोबत नेले. त्यानंतर गुंजेपार परिसरातील एका निर्जन ठिकाणी नेऊन तिच्यावर अत्याचार केल्याचा आरोप आहे.

शुक्रवारी सकाळी पीडित मुलीने घरी परतल्यानंतर घडलेला प्रकार तिच्या कुटुंबियांना सांगितला. ही बाब गावात समजताच नागरिकांमध्ये संतापाची लाट उसळली. दरम्यान, या घटनेची चर्चा वाढल्यामुळे मानसिक तणावाखाली आलेल्या पीडित मुलीने विषप्राशन केल्याचे समोर आले आहे. तिला तातडीने भंडारा जिल्हा सामान्य रुग्णालयात दाखल करण्यात आले असून तिच्यावर उपचार सुरू आहेत.

पोक्सो कायद्यांगर्त कारवाई

या प्रकरणी भंडारा पोलिसांनी तत्काळ कारवाई करत आरोपीविरुद्ध पोक्सो कायदा तसेच भारतीय न्याय संहितेच्या संबंधित कलमान्वये गुन्हा दाखल केला असून आरोपीला अटक करण्यात आली आहे. पुढील तपास सुरू आहे. या घटनेमुळे पुन्हा एकदा महिलांच्या आणि अल्पवयीन मुलांच्या सुरक्षेचा प्रश्न ऐरणीवर आला असून आरोपीवर कठोरात कठोर कारवाई करण्याची मागणी नागरिकांकडून होत आहे.