IIT बॉम्बेच्या विद्यार्थ्याने संपवलं आयुष्य, हॉस्टेलच्या खोलीत आढळला मृतदेत, मोबाईल चॅटमधून धक्कादायक खुलासा

देशातील अत्यंत प्रतिष्ठित संस्थांपैकी एक असलेल्या ‘इंडियन इन्स्टिट्यूट ऑफ टेक्नॉलॉजी’ (IIT) बॉम्बेमधून अत्यंत दुःखद आणि धक्कादायक बातमी समोर आली आहे. संस्थेच्या हॉस्टेल परिसरातील आपल्या खोलीत पंख्याला गळफास घेऊन एका दुसऱ्या वर्षाच्या विद्यार्थ्याने आत्महत्या केली आहे. विद्यार्थ्याच्या आत्महत्येची माहिती समोर आल्यानंतर सर्वत्र खळबळ माजली आहे. तर हॉस्टेल परिसरात शोककळा पसरली आहे. मिळालेल्या माहितीनुसार, 29 जुलै 2026 रोजी रात्री पवई येथील संस्थेच्या परिसरातील हॉस्टेल क्रमांक 4, खोली क्रमांक जी-4147 मध्ये विद्यार्थ्याचा मृतदेह आढळला आहे…

मृत विद्यार्थ्याचं नाव सोहिल राजकुमार असं असून त्याचं वय फक्त 20 वर्ष होतं. सोहिल मटीरियल सायन्स विभागात दुसऱ्या वर्षात शिकत होता. पोलिसांनी दिलेल्या माहितीनुसार, विद्यार्थ्यांने हॉस्टेलच्या खोलीतच स्वतःचा जीवन प्रवास संपवला. घटनेची माहिती मिळताच पवई पोलिस स्टेशन येथील एक पथक घटनास्थळी पोहोचलं. पोलिसांनी मृतदेह ताब्यात घेतला असून, कायदेशीर प्रक्रिया सुरु केली आहे… तर पोलीस सध्या याप्रकरणी पुढील तपास करत आहेत.

कौटुंबिक तणाव आणि वैयक्तिक संबंधांमधील ताण यांची भीती

प्राथमिक तपासात असं समोर आलं आहे की, मृत विद्यार्थी मूळचा राजस्थानमधील पिलानी येथील होता. तपासादरम्यान पोलिसांनी त्या विद्यार्थ्याचा मोबाईल फोन आणि चॅट रेकॉर्ड्स तपासले, ज्यातून अनेक महत्त्वपूर्ण बाबी समोर आल्या. प्राथमिक माहितीनुसार, तो काही काळापासून कौटुंबिक समस्यांमुळे अस्वस्थ होता आणि आपल्या वैयक्तिक नातेसंबंधातील कठीण परिस्थितीतूनही जात होता.

मोबाईल आणि इलेक्ट्रॉनिक सामानाची होतोय तपास

पोलिसांच्या म्हणण्यानुसार, आत्महत्येमागची नेमकी कारणं शोधून काढण्यासाठी त्या विद्यार्थ्याचा मोबाईल फोन, लॅपटॉप आणि इतर सर्व इलेक्ट्रॉनिक उपकरणांची बारकाईने तपासणी केली जात आहे. कोणत्या विशिष्ट दबावामुळे किंवा मानसिक तणावामुळे त्या विद्यार्थ्याने असं टोकाचं पाऊल उचललं आहे का, हे समजून घेण्याचा प्रयत्न पोलीस करत आहेत.