‘अंदर बाहर’ गेमचा नाद नडला, शासकीय कॉन्ट्रॅक्टरला लाखोंचा गंडा, जळगावात नेमकं काय घडलं?
जळगाव जिल्ह्यातील पाचोरा तालुक्यातील एका शासकीय ठेकेदाराची ऑनलाईन गेमिंगच्या माध्यमातून ७८ लाख ९० हजार ५०० रुपयांची फसवणूक झाली आहे. "अंदर बाहर" या ऑनलाइन गेमच्या आमिषाने दोन अज्ञात आरोपींनी त्यांची फसवणूक केली.
गेल्या काही दिवसांपासून आर्थिक फसवणुकीच्या अनेक घटना सातत्याने घडत आहेत. त्यातच आता जळगावात एका शासकीय ठेकेदाराची 78 लाखांपेक्षा जास्त रुपयांची फसवणूक करण्यात आली आहे. ऑनलाईन गेम खेळा आणि भरघोस कमाई करा, असे अमिष दाखवत त्या कॉन्ट्रक्टरला गंडा घालण्यात आला आहे. याप्रकरणी सायबर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार जळगावातील पाचोरा जिल्ह्यातील कॉन्ट्रक्टरला ऑनलाईन गेम खेळण्याच्या नादात गंडा लागला आहे. ऑनलाईन गेम खेळून भरघोस कमाई करा, असे आमिष दाखवत रोशन पद्मसिंग पाटील (२७) यांची तब्बल ७८ लाख ९० हजार ५०० रुपयांची ऑनलाईनरित्या फसवणूक करण्यात आली. हा प्रकार ३ नोव्हेंबर २०२४ ते १२ जानेवारी २०२४ दरम्यान घडला. या प्रकरणी दोन जणांविरुध्द सायबर पोलिस ठाण्यात गुन्हा दाखल करण्यात आला आहे.
नेमकं काय घडलं?
रोशन पाटील यांना ३ नोव्हेंबरला दोन जणांनी व्हॉट्सअॅपवर संपर्क साधला. यावेळी त्यांनी एका वेबसाईटवर ‘अंदर बाहर’ आणि ‘अंदर बाहर २’ हे गेम खेळल्यास मोठ्या प्रमाणात पैसे जिंकू शकता, असे आमिष दाखवले. त्यावर विश्वास ठेवून रोशन पाटील यांनी तो गेम खेळण्यास सुरुवात केली.
यानंतर त्या दोन भामट्यांनी रोशन पाटील यांना तुम्ही हा गेम जिंकला आहेत, असे भासवले. त्यानंतर त्यांनी त्यांच्या बँक खात्यात 7 लाख रुपये जमा केले. यामुळे रोशन पाटील यांचा विश्वास बसला. यानंतर ते वेळोवेळी हा ऑनलाईन गेम खेळत गेले. यावेळी त्यांनी नेटबँकिंगद्वारे एकूण ७८ लाख ९० हजार ५०० रुपये यात गुंतवले. पण काही दिवसांनी ही रक्कम परत आलीच नाही. ऑनलाइन गेमिंगच्या माध्यमातून पैसे मिळणे दूरच, उलट गुंतविलेली रक्कमही गेल्याने आपली फसवणूक झाल्याचे रोशन पाटील यांच्या लक्षात आले. त्यानुसार त्यांनी सायबर पोलिस ठाण्यात तक्रार दाखल केली. याप्रकरणी त्यांनी साधणाऱ्या दोन जणांविरुद्ध गुन्हा दाखल केला आहे.
