औरंगाबादः औरंगाबाद शहराच्या नामांतराची (Aurangabad name change) प्रक्रिया अद्याप पूर्ण झालेली नसतानाही राज्याच्या पर्यटन (Maharashtra Tourism) संचलनालयाला औरंगाबाद शहराचं नामांतर करण्याची घाई झालेली दिसतेय. पर्यटन संचलनालयाच्या ट्विटर हँडलवर शहराच्या नावाचा उल्लेख करताना संभाजीनगर (Sambhajinagar) असा करण्यात आला आहे. त्यामुळे नामांतर विरोधी नेते आणि संघटनांची तीव्र प्रतिक्रिया उमटण्याची शक्यता आहे. राज्याच्या पर्यटन संचलनालयाचे महाराष्ट्र टुरिझम या नावाने ट्विटर हँडल आहे. यावर दौलताबाद अर्थात देवगिरी किल्ल्याची माहिती देताना औरंगाबाद ऐवजी संभाजीनगर असा उल्लेख करण्यात आला आहे. शहरातील अनेक खासगी आस्थापनांनी तर विविध ठिकाणी संभाजीनगर असा उल्लेख करणे सुरु केले आहे. मात्र सरकारी विभागाच्या अधिकृत ट्विटर हँडलवरही पूर्ण नामांतर प्रक्रिया झालेली नसताना अशा प्रकारे उल्लेख केल्याने विविध समाज आणि संघटनांचा रोष ओढवण्याची शक्यता वर्तवण्यात येत आहे.
महाराष्ट्र टुरिझम या ट्विटर हँडलवरून राज्यातील विविध पर्यटन स्थळांची माहिती तसेच वैशिष्ट्य सांगितले जाते. काल 10 ऑगस्ट रोजी या अकाउंटवरून औरंगाबाद शहरातील दौलताबाद किल्ल्याविषयीचं ट्विट टाकण्यात आलंय.. संभाजीनगरमधील देवगिरी किल्ला ऐतिहासिक दृष्ट्या महत्त्वाचा असून पर्यटकांना इतिहासात डोकावून पाहण्यासाठी आणि आपल्या समृद्ध वारशाबद्दल जाणून घेण्यासाठी योग्य ठिकाणी आहे. आपण या पर्यटन स्थळाला भेट दिली असेल तर त्याविषयीच्या प्रतिक्रिया कमेंटमध्ये लिहा… टुरिझमच्या ऑफिशियल अकाउंट वरून शहराच्या नावाचा बदल करण्यात आल्याने याला नामांतर विरोधी संघटनांच्या तीव्र प्रतिक्रिया उमटत आहेत.
The Devagiri Fort, in Sambhaji Nagar beholds a strong history for tourists to dig into and explore its rich heritage. Have you been here? Tell us in the comments below.
Credit – travelmatcha pic.twitter.com/X8eVgFStlo— Maharashtra Tourism (@maha_tourism) August 10, 2022
दरम्यान, महाविकास आघाडी सरकारने संभाजीनगर नामांतराचा प्रस्ताव मंजूर केल्यानंतर गूगल मॅपवरदेखील पूर्ण प्रक्रिया होण्यापूर्वीच नामांतराची घाई केली होती. गूगल मॅपवर औरंगाबाद ऐवजी संभाजीनगर असा उल्लेख दिसत होता. शहरातील सामान्यांपासून राजकीय नेते आणि संघटनांमध्येही याची जोरदार चर्चा झाली होती. नामांतरविरोधी संघटना तसेच एमआयएमचे खासदार इम्तियाज जलील यांनी तीव्र आक्षेप नोंदवल्यानंतर गूगल मॅपवरून संभाजीनगर हा उल्लेख बदलण्यात आला.
महाविकास आघाडी सरकारने मंजूर केलेला संभाजीनगरचा प्रस्ताव एकनाथ शिंदे सरकारने आधी रद्द केला. त्यानंतर शिंदे सरकारने पुन्हा या प्रस्तावाला मंजुरी दिली. आता केंद्र सरकारची मंजुरी येणे अद्याप बाकी आहे. तत्पुर्वी ही प्रक्रिया पूर्ण होण्यापूर्वी नामांतरविरोधी संघटना कोर्टात धाव घेण्याच्या तयारीत आहे. खासदार इम्तियाज जलील यांनीदेखील शिवसेना, भाजप, काँग्रेस आणि राष्ट्रवादी काँग्रेसने घेतलेल्या या निर्णयाविरोधात लवकरच कोर्टातील आणि रस्त्यावरील लढाई लढणार असल्याचा इशारा दिला आहे.