Imran Khan: ‘तो केवळ तिथून जात होता’, इम्रान खान आंदोलनप्रकरणात वकिलांचा तो मोठा दावा…

इम्रान खान याच्या वकिलांचा मोठा दावा

Actor Imran Khan Lawyers claim: मुख्य निवडणूक आयुक्त ज्ञानेश कुमार यांच्याविरोधात मुंबईत कॉकरोच जनता पार्टीने (CJP) उग्र आंदोलन केले. त्याला उद्धव सेना आणि मनसेचे बळ मिळाले. या आंदोलनात प्रसिद्ध बॉलिवूड अभिनेते इम्रान खान याने ही सहभाग घेतला होता. त्यानंतर परदेशी नागरिकांची प्रादेशिक नोंदणी कार्यालयाने (FRRO) 28 ऑक्टोबरपर्यंत त्याला भारत सोडण्याचा आदेश दिला. इम्रान खान हा भारतीय नागरीक नाहीत आणि ते या आंदोलनात सहभागी होऊ शकत नाही असा दावा कार्यालयाने केला होता. त्याविरोधात इम्रान खान याने मुंबई उच्च न्यायलयात धाव घेतली आहे. इम्रान खानने भारत सोडण्याच्या नोटीसला मुंबई उच्च न्यायालयात आव्हान दिले आहे. तर त्याचवेळी त्याच्या वकिलाने दावा केला आहे की, तो या आंदोलनाचा भाग नव्हता.

‘तो केवळ तिथून जात होता’

टाइम्स ऑफ इंडियाच्या एका वृत्तानुसार, इम्रान खानचे वकील जुल्फिकार मेमन, परवेज मेमन आणि चिराग नाईक यांनी इम्रान हा या आंदोलनाचा भाग नव्हता. तो तर केवळ नाना चौकातून जात होता. तेव्हा तिथे बॅरिकेटिंग लावण्यात आली होती आणि तो केवळ माध्यमांशी बोलत उभा होता. त्याचवेळी पोलिसांनी त्याला उचलले, असे म्हणणे सादर केले. परदेशी नागरीक कायद्याचे उल्लंघन केल्याचे कारण पुढे करत इम्रान खान याला 28 ऑक्टोबरपर्यंत देश सोडण्याचे निर्देश दिले आहेत. या कारवाईनंतर अभिनेत्याच्या अडचणीत वाढ झाली आहे.

त्याला या प्रकरणात गोवले जात आहे

इम्रान खान याच्या वकिलांनी पोलिसांचे सर्व आरोप फेटाळले आहेत. इम्रान खान याचा या निषेध आंदोलनाशी अथवा निदर्शनांशी कोणताही संबंध नव्हता. तो केवळ तिथून जात होता. बॅरिकेटिंग लावल्याने तो गर्दीत दिसला. माध्यमांनी त्याला पाहताच गरडा घातला. त्याला या प्रकरणात नाहक गोवले जात असल्याचा दावा वकिलांनी केला आहे.

मग सीसीटीव्ही फुटेज तपासा

देश सोडून जाण्याच्या आदेशाला इम्रान खानने तातडीने मुंबई उच्च न्यायालयात आव्हान दिले आहे. याचिकेत नाना चौकातील सीसीटीव्ही फुटेज तपासण्याचे आणि ते दाखवण्याची विनंती करण्यात आली आहे. वकिलांच्या मते ते त्या परिसरातून केवळ जात होते. बॅरिकेटिंगमुळे ते गर्दीत दिसले. त्यांचा या आंदोलनात, प्रदर्शनात सहभागी होण्याचा कोणताही हेतू नव्हता.