Dawood Ibrahim Ancestral House: मोठी बातमी! ज्या घरात बॉम्बस्फोटांचा कट रचला तेच घर पाडणार, दाऊदच्या वडिलोपार्जित घरावर फिरणार बुलडोझर

Dawood Ibrahim Ancestral House: अंडरवर्ल्ड डॉन दाऊद इब्राहिमचे वडिलोपार्जित घर मुंबईतील भेंडी बाजार परिसरातील पाकमोडिया लेन येथे आहे. आता BMCने या घरावर बुल्डोझर फिरवण्याचा निर्णय घेतला आहे. आज ही कारवाई होणार आहे.

Dawood Ibrahim Ancestral House: मोठी बातमी! ज्या घरात बॉम्बस्फोटांचा कट रचला तेच घर पाडणार, दाऊदच्या वडिलोपार्जित घरावर फिरणार बुलडोझर
Dawood
Image Credit source: tv9 Marathi
| Updated on: Nov 18, 2026 | 8:20 AM

भेंडी बाजार हा मुंबईतील ऐतिहासिक आणि गर्दीचा भाग. येथील पाकमोडिया लेन हे अंडरवर्ल्ड डॉन दाऊद इब्राहिमच्या कुटुंबाचे जुने ठिकाण म्हणून ओळखले जाते. दाऊदचे वडील इब्राहिम कास्कर यांचे घर आणि संबंधित मुसाफिरखाना इमारत वर्षानुवर्षे वादात राहिली आहे. ही इमारत अत्यंत जीर्ण अवस्थेत असून, तिच्या भिंती व छत कोसळण्याचा धोका निर्माण झाला आहे. स्थानिक रहिवासी आणि व्यापारी या इमारतीच्या सुरक्षिततेबाबत अनेकदा तक्रारी करत आले आहेत.

मुंबईतील भेंडी बाजार परिसरातील पाकमोडिया लेनमध्ये अंडरवर्ल्ड डॉन दाऊद इब्राहिमच्या वडिलोपार्जित घर आणि संबंधित इमारतीवर अखेर महापालिकेचा बुलडोझर चालणार आहे. हाजी इस्माईल हबीब मुसाफिरखाना ही जीर्ण आणि धोकादायक इमारत जमीनदोस्त करण्याची तयारी बृहन्मुंबई महानगरपालिकेने केली आहे. यासंदर्भात अधिकृत नोटीस जारी करण्यात आली असून, आज तोडकामाची कारवाई करण्यात येणार आहे. ही कारवाई उच्च न्यायालयाच्या आदेशानुसार होणार आहे.

Loading...

उच्च न्यायालयाने दिले आदेश

महापालिकेने इमारतीची पाहणी केल्यानंतर ती धोकादायक असल्याचे समोर आले. उच्च न्यायालयातही याबाबत याचिका दाखल झाल्या होत्या. न्यायालयाने महापालिकेला आवश्यक कारवाई करण्याचे स्पष्ट निर्देश दिले. त्यानुसार महापालिकेने अधिकृत नोटीस काढून इमारत तोडण्याची प्रक्रिया सुरू केली आहे. आजच्या कारवाईत बुलडोझर आणि इतर यंत्रसामग्री वापरली जाणार आहे. परिसरात सुरक्षा व्यवस्था बळकट करण्यात आली असून, पोलिस आणि महापालिका कर्मचारी तैनात राहतील.

याच घरात रचला कट

हे दाऊद इब्राहिमचे वडिलोपार्जित घर आहे आणि १९८६ मध्ये भारतातून पलायन करण्यापूर्वी तो आणि त्याचे कुटुंब याच इमारतीत राहत होते. याच इमारतीत दाऊद इब्राहिमचे घर आणि कार्यालय होते, जिथे १९९३ च्या मुंबई बॉम्बस्फोटांचा कट रचण्यात आला होता. बीएमसीने इमारत पाडण्यासाठी १८ आणि १९ नोव्हेंबर, २०२६ या तारखा निश्चित केल्या होत्या. ही इमारत ८० वर्षांहून अधिक जुनी असून तिची अवस्था धोकादायक झाली होती. सुरक्षेच्या कारणास्तव आणि मुंबई उच्च न्यायालयाच्या निर्देशांनुसार ती पाडण्याचा निर्णय घेण्यात आला. बीएमसीच्या ‘सी’ वॉर्डने १६ नोव्हेंबर, २०२६ रोजी एक नोटीस जारी करून, ही इमारत ‘सी-१’ श्रेणीतील, अत्यंत जीर्ण आणि धोकादायक असल्याचे घोषित केले आणि ती पाडण्याचे आदेश दिले. मुंबई उच्च न्यायालयाच्या ३१ ऑगस्ट, २०२० च्या आदेशानुसार, ही कारवाई मोठ्या पोलीस बंदोबस्तात केली जाईल.

Loading...
Unable to load recommendations.
Follow Us