Maharashtra Corona Update : रुग्णसंख्येत काहीशी घट, चिंता मात्र कायम! दिवसभरात 47 हजार 288 नवे कोरोना रुग्ण
गेल्या 24 तासांत राज्यात 47 हजार 288 जणांची कोरोना चाचणी पॉझिटिव्ह आली आहे. तर दिवसभरात 26 हजार 252 रुग्ण कोरोनामुक्त झाले आहेत.
मुंबई : राज्यात सोमवारपेक्षा मंगळवारी कोरोना रुग्णांच्या संख्येत काहीशी घट पाहायला मिळत आहे. गेल्या 24 तासांत राज्यात 47 हजार 288 जणांची कोरोना चाचणी पॉझिटिव्ह आली आहे. तर दिवसभरात 26 हजार 252 रुग्ण कोरोनामुक्त झाले आहेत. त्यामुळे राज्यातील रुग्ण बरे होण्याचे प्रमाण 83.36 टक्के झालं आहे. राज्यात आज मृत्यूच्या संख्येतही काही दिलासा मिळाला आहे. आज दिवसभरात 155 जणांचा कोरोनामुळे मृत्यू झालाय. सोमवारी हिच संख्या 222 वर होती. सध्या राज्यातील मृत्यू दर 1.83 टक्के एवढा आहे. (In Maharashtra, 47,288 new corona patients, 155 died due to corona on Tuesday)
राज्यात सध्या 24 लाख 16 हजार 981 व्यक्ती होम क्वारंटाईन आहे. तर 20 हजार 115 वक्ती संस्थात्मक क्वारंटाईनमध्ये आहेत. राज्यात आज रोजी 4 लाख 51 हजार 375 रुग्णांवर उपचार सुरु आहेत.
मुंबईतील कोरोना स्थिती –
मुंबईत आजही कोरोना रुग्णांची संख्या मोठी आहे. गेल्या 24 तासांत मुंबई 9 हजार 857 जणांची कोरोना चाचणी पॉझिटिव्ह आली आहे. तर 3 हजार 357 रुग्ण कोरोनामुक्त झाले आहेत. आज दिवसभरात 21 जणांचा कोरोनामुळे मृत्यू झाला आहे. मृत्यू झालेल्या रुग्णांपैकी 13 जणांना काही दीर्घकालीन आजार होते. मृतांमध्ये 11 पुरुष तर 10 महिलांचा समावेश आहे.
मुंबईत आज रोजी 74 हजार 522 रुग्णांवर उपचार सुरु आहेत. मुंबई जिल्ह्यातील बरे झालेल्या रुग्णांचा दर 81 टक्के आहे. तर रुग्ण दुपटीचा कालावधी 40 दिवसांवर येऊन ठेपलाय. मुंबईत 29 मार्च ते 4 एप्रिल पर्यंत एकूण कोविड वाढीचा दर 1.70 टक्के झाला आहे.
पुण्यातील कोरोना स्थिती –
पुण्यात आज दिवसभरात 4 हजार 77 नव्या रुग्णांची भर पडली आहे. तर 3 हजार 240 जण पूर्णपणे कोरोनामुक्त झाले आहेत. पुण्यात आज 46 जणांचा कोरोनामुळे मृत्यू झालाय. त्यातील 10 रुग्ण पुण्याबाहेरील आहेत. पुण्यात सध्या 42 हजार 741 रुग्णांवर उपचार सुरु आहेत.
नव्या आकडेवारीसह पुण्यातील कोरोना रुग्णांची एकूण संख्या आता 2 लाख 94 हजार 121 वर जाऊन पोहोचली आहे. त्यातील 2 लाख 45 हजार 892 जण पूर्णपणे कोरोनामुक्त झाले आहेत. पुण्यात आतापर्यंत 5 हजार 488 जणांचा कोरोनामुळे मृत्यू झाला आहे.
पिंपरी चिंचवडमधील कोरोना स्थिती –
पिंपरी चिंचवडमध्ये आज दिवसभरात 2 हजार 152 जणांची कोरोना चाचणी पॉझिटिव्ह आली आहे. तर 1 हजार 815 रुग्ण कोरोनामुक्त झाले आहेत. आज दिवसभरात पिंपरी-चिंचवडमध्ये 16 जणांचा कोरोनामुळे मृत्यू झालाय. पिंपरी-चिंचवडमधील कोरोना रुग्णांची एकूण संख्या 1 लाख 53 हजार 80 वर पोहोचली आहे. त्यातील 1 लाख 28 हजार 450 रुग्ण पूर्णपणे कोरोनामुक्त झाले आहेत. तर आतापर्यंत 2 हजार 79 जणांचा कोरोनामुळे मृत्यू झालाय.
संबंधित बातम्या :
In Maharashtra, 47,288 new corona patients, 155 died due to corona on Tuesday
