बस्त्यापासून लग्नापर्यंत… उद्या घराबाहेर पडताना थोडं सबूर; मेगाब्लॉक कुठे कुठे? जाणून घ्या
रविवारी मध्य, पश्चिम आणि हार्बर रेल्वे मार्गांवर मोठा मेगाब्लॉक असणार आहे. कामांसाठी किंवा प्रवासासाठी घराबाहेर पडणाऱ्यांनी वेळेचे नियोजन करताना सतर्क राहावे. विविध मार्गांवर सकाळी ३.५५ ते दुपारी ४.४० पर्यंत ब्लॉक असल्याने प्रवाशांना मोठा त्रास होऊ शकतो. रेल्वेचे अद्ययावित वेळापत्रक पाहूनच प्रवासाला निघा.
रविवार म्हटलं तर प्रत्येकजण काही ना काही महत्त्वाची कामे काढत असतो. या कामांसाठी कुटुंबासह लोक घरी पडतात. कुणाचा बस्ता असतो, कुणाचा साखरपुडा, कुणाचं लग्न, तर कुणाच्या जलदानविधीच्या कार्यक्रमासाठी अनेकजण घराबाहेर पडतात. तर काही लोक खरेदीसाठीही घराबाहेर पडतात. काही लोक नातेवाईकांना भेटण्यासाठी म्हणून बाहेर पडतात. तर काही लोक निव्वळ फिरायला जायचं म्हणून बाहेर पडतात. पण उद्या रविवारी घराबाहेर पडताना थोडं सबूरीनं घ्या. मध्य, हार्बर आणि पश्चिम रेल्वेवर मोठा मेगाब्लॉक असणार आहे. त्यामुळे मेगाब्लॉकचा टाइम टेबल पाहूनच बाहेर पडा. नाही तर मोठा त्रास सहन करावा लागण्याची शक्यता आहे.
तांत्रिक कामांसाठी पश्चिम रेल्वेतर्फे आज शनिवारी रात्री आणि रविवारी मध्य रेल्वेवर मेगाब्लॉक घेण्यात येणार आहे. पश्चिम रेल्वेवर माहीम-मुंबई सेट्रल जलद मार्गावर हा ब्लॉक असेल. तर, मध्य रेल्वेच्या माटुंगा-मुलुंड धीम्या मार्गावर, तर हार्बर मार्गावरील सीएसएमटी-चुनाभट्टी/वांद्रे मेगाब्लॉक असणार आहे.
कुठे कसा मेगाब्लॉक…
पश्चिम रेल्वे –
कुठे : माहीम-मुंबई सेंट्रल, जलद अप-डाऊन मार्ग
कधी : मध्यरात्री १२.२५ ते पहाटे ४.२५ पर्यंत
परिणाम : ब्लॉक कालावधीत जलद मार्गावरील सर्व लोकल अंधेरी, सांताक्रूझ ते चर्चगेट स्थानकांदरम्यान धीम्या मार्गावर धावतील.
मध्य रेल्वे (मुख्य मार्ग) –
कुठे : माटुंगा-मुलुंड, अप-डाऊन धिमा मार्ग
कधी : सकाळी ३.५५ ते ११.०५ पर्यंत
परिणाम : सीएसएमटी येथून सुटणाऱ्या धिम्या लोकल माटुंगा-मुलुंड स्थानकांदरम्यान जलद मार्गावर वळवल्या जातील. ठाणे येथून सुटणाऱ्या धिम्या मार्गावरील सेवा मुलुंड येथून अप जलद मार्गावर वळवण्यात येतील.
हार्बर रेल्वे –
कुठे : सीएसएमटी-चुनाभट्टी/वांद्रे, अप-डाऊन मार्ग
कधीः सकाळी ११. १० ते दुपारी ४.४० पर्यंत
परिणाम : सीएसएमटी/वडाळा येथून वाशी/बेलापूर/पनवेलसाठी सुटणारी हार्बर मार्गावरील सेवा आणि वांद्रे/गोरेगाव येथून सीएसएमटीसाठी लोकल सेवा रद्द करण्यात येणार आहे. तर, पनवेल/बेलापूर/वाशी येथून सीएसएमटीकडील सेवा बंद असेल. यावेळी पनवेल-कुर्ला दरम्यान विशेष सेवा २० मिनिटांच्या वारंवारतेने चालविण्यात येईल.
