मोठी बातमी, भोंदूबाबा अशोक खरातच्या HIV टेस्टचा रिपोर्ट समोर

अध्यात्म आणि भोंदूगिरीच्या नावाखाली महिलांचे आयुष्य उद्ध्वस्त करणाऱ्या अशोक खरात प्रकरणी नवनवीन अपडेट सुरु आहेत. अशोक खरात प्रकरणाने महाराष्ट्राच्या सामाजिक आणि पोलीस वर्तुळात मोठी खळबळ उडवून दिली आहे. या प्रकरणाचे गांभीर्य लक्षात घेऊन स्थापन करण्यात आलेल्या विशेष तपास पथकाने (SIT) आता आपला तपासाचा वेग आणखी वाढवला आहे. आता अशोक खरातचे वैद्यकीय अहवाल समोर आले आहेत. त्यामुळे तपासाला नवीन दिशा मिळाली आहे.

HIV टेस्टचा रिपोर्ट काय?

अशोक खरातने शेकडो महिलांचे लैंगिक शोषण केल्याचा प्राथमिक अंदाज पोलिसांनी व्यक्त केला आहे. या कृत्यामुळे पीडित महिलांच्या आरोग्यावर गंभीर परिणाम होण्याची शक्यता वर्तवण्यात येत होती. तांत्रिक पुरावा गोळा करणे आणि पीडितांच्या सुरक्षिततेचा विचार करून पोलिसांनी अशोक खरातची ससून रुग्णालयात वैद्यकीय तपासणी केली होती. यावेळी त्याच्या काही टेस्टही करण्यात आल्या होत्या. यात एचआयव्ही टेस्टचाही समावेश होता.

आता अशोक खरातच्या एचआयव्ही टेस्टचा रिपोर्ट समोर आला आहे. अशोक खरातच्या HIV चाचणीचा अहवाल निगेटिव्ह आल्याने वैद्यकीयदृष्ट्या तपासातील एक महत्त्वाचा टप्पा पूर्ण झाला आहे. त्यातच आता अशोक खरातच्या एसआयटीची चौकशी सुरु आहे. या चौकशीत अशोक खरातच्या गुन्हेगारी पद्धतीची धक्कादायक माहिती समोर आली आहे. अशोक खरात हा महिलांना भविष्य सांगण्याच्या बहाण्याने किंवा त्यांच्या घरातील दोष दूर करण्याच्या नावाखाली जाळ्यात ओढत असे. याप्रकरणी अनेक महिलांनी तक्रार केली आहे की, तो संमोहित करून किंवा घरातील व्यक्तीचा मृत्यू होईल अशी भीती घालून त्यांचे शारीरिक शोषण करत असे.

अशोक खरातला 29 मार्चपर्यंत पोलीस कोठडी

आतापर्यंतच्या तपासात अशोक खरातने १५० हून अधिक महिलांवर अत्याचार केल्याचा संशय आहे. यातील अनेक महिला भीतीपोटी समोर येण्यास कचरत आहेत. न्यायालयाने अशोक खरातच्या गुन्ह्याचे स्वरूप अत्यंत गंभीर मानले आहे. तपासासाठी पुरेसा वेळ मिळावा आणि जास्तीत जास्त पीडितांना न्याय मिळावा, यासाठी न्यायालयाने त्याला २९ मार्चपर्यंत पोलीस कोठडी सुनावली आहे. एसआयटी सध्या या प्रकरणातील आर्थिक व्यवहार त्याला मदत करणारे हस्तक आणि गुन्ह्यात वापरलेली ठिकाणे यांचा शोध घेत आहे.