वनराई, पाऊस, धुकं, पक्ष्यांचा किलबिलाट, फेसाळणारे धबधबे; पर्यटकांच्या डोळ्याचं पारणं फेडणारं इगतपुरी!
मागील आठवड्यापासुन इगतपुरी तालुक्यात जोरदार पावसाला सुरुवात झाल्याने तालुक्यातील धरण साठ्यात कमालीची वाढ झाली आहे. या पावसामुळे ठिकठिकाणी डोंगर उतारावरून पाण्याचे धबधबे सुरू झाल्याने पर्यटकांची इकडे गर्दी वाढत आहे.
नाशिक : मागील आठवड्यापासुन इगतपुरी तालुक्यात जोरदार पावसाला सुरुवात झाल्याने तालुक्यातील धरण साठ्यात कमालीची वाढ झाली आहे. या पावसामुळे ठिकठिकाणी डोंगर उतारावरुन धबधबे वाहू लागल्याने पर्यटकांची इकडे गर्दी वाढत आहे.
कोरोनाचा काळ सुरु पण हौशी पर्यटकांची छुप्या पद्धतीने पर्यटनस्थळी हजेरी
तालुक्यात भावली डॅम, अशोका धबधबा, वैतरणा डॅम, भंडारदरा धरण, दारणा धरण, नगरपालिका डॅम, रेल्वे तलाव, तळेगाव डॅम, कपारेश्वर महादेव, घाटनदेवी मंदिर, उंटदरी, भाम धरण तसेच विश्वविख्यात विपश्यना केंद्र ही येथेच आहेत. या सर्वच ठिकाणी पर्यटनासाठी मोठी गर्दी होत आहे. कोरोनाचा काळ असल्याने येथे पर्यटकांना येण्यासाठी बंदी असूनही चोरी छुप्या मार्गाने पर्यटक शनिवार व रविवारी मोठया प्रमाणात हजेरी लावत आहे.
इगतपुरी तालुक्याचा स्वर्ग समजला जाणारा भावली धरण परिसर… निसर्गराजाने नेत्रात साठवता येणार नाही एवढी भरभरुन दिलेली वनराई… धुंद करणारा पाऊस… क्षणात पालटणारं धुकेमय वातावरण…घनदाट वृक्षांची छाया… फेसाळणारे धबधबे… खोल खोल दऱ्या… हंबरत हंबरत चरणारी गायी गुरे…किलबिलाट करणारे पक्ष्यांचे थवे…रानफुलांचा मंद सुगंध…अशा प्रकारे विविध अंगांनी शेकडो पर्यटकांचं इथला धरण स्वागत करतो.
पर्यटनस्थळी हजारो पर्यटकांची गर्दी
अशा वातावरणात पावसाळी पर्यटनाचा आनंद काही औरच! आणि त्यातही धबधब्याखाली चिंब भिजायला कुणाला आवडणार नाही? त्यासाठीच पावसाळी पर्यटनासाठी त्यातल्या त्यात योग्य वातावरण आणि योग्य ठिकाणाचा शोध हौशी पर्यटकांकडून घेतला जातोय. या पर्यटनाचा आनंद घेण्यासाठी मुंबई, नाशिक, पुणे अशा महाराष्ट्राच्या विविध भागातून शनिवार, रविवारी व सुट्टीच्या काळात हजारो पर्यटक भेट देऊन आनंद घेत असतात.
मॉन्सून डेस्टिनेशनच्या शोधात आहात?
उष्ण वातावरणातही पावसाळी पर्यटनाचा आनंद घ्यायचा असेल तर कसारा घाटातील विहिगाव ( ता.शहापुर ) येथील “अशोका धबधबा” व तळेगाव येथील कपारेश्वर महादेव, रेल्वे तलाव नगरपरिषद डॅम व धबधबा हा वन डे मॉन्सून डेस्टिनेशनच्या शोधात असणाऱ्या पर्यटकांसाठी एक उत्तम पर्याय आहेत…
(Nashik Igatpuri Waterfall Flowing Crowds of tourists at igatpuri Waterfall)
हे ही वाचा :
जामीन फेटाळताच छातीत ‘कळ’, लाच प्रकरणातील आरोपी वैशाली वीर-झनकर रुग्णालयात