माझ्या मुलाने मुख्यमंत्री व्हावे, अजित पवार यांच्या मातोश्रींची इच्छा

asha pawar and sunetra pawar

Image Credit source: tv9 Marathi

अभिजित पोते, बारामती, पुणे | 5 नोव्हेंबर 2023 : लोकांचे भरभरुन प्रेम मिळाले आहे. बारामतीमधील जनताही आमच्या सोबत आहेत. आता माझे वय ८६ झाले आहे. लोकांनाही वाटते अजित पवार यांनी मुख्यमंत्री व्हावे. माझ्या देखतच दादाने राज्याचे मुख्यमंत्री व्हावे, हीच माझी सुद्धा इच्छा आहे, हे बोल आहेत, अजित पवार यांच्या मातोश्री आशाताई पवार यांचे. राज्यातील ग्रामपंचायतीसाठी आज सकाळपासून मतदानास सुरुवात झाली. अजित पवार यांचे गाव असलेल्या काटेवाडीत अजित पवार यांच्या मातोश्री आशाताई पवार आणि अजित पवार यांच्या पत्नी सुनेत्रा पवार यांनी मतदान केले. त्यानंतर आशाताई पवार यांच्याशी माध्यमांनी संवाद साधला. लोकांनी भरभरुन प्रेम दिले. त्यामुळे आता ‘दादा’ने मुख्यमंत्री व्हावे, हीच आपली इच्छा राहिल्याचे त्यांनी सांगितले.

काटेवाडीत विजय निश्चित

काटेवाडी ग्रामपंचायतीवर अजित पवार यांचे वर्चस्व राहिले आहे. परंतु या वर्चस्वाला आता सत्तेत एकत्र असलेल्या भाजपकडून आव्हान दिले आहे. परंतु गावातील लोक आपल्या सोबतच आहे. आमचा विजय निश्चित आहे, असे आशाताई पवार यांनी सांगितले. मी काटेवाडीत आली तेव्हा गावात काहीच नव्हते. त्यानंतर सूनबाईने गावासाठी काम केले. आता खूप बदल झाले.

अजित पवार करणार नाही मतदान

अजित पवार यांना अशक्तपणा आहे. त्यामुळे ते मतदानास येणार नाही, असे त्यांच्या पत्नी सुनेत्रा पवार यांनी सांगितले. अजित पवार यांना डेंग्यू झाला आहे. डॉक्टरांनी त्यांना विश्रांतीचा सल्ला दिला आहे. गावात आमचा विजय निश्चित आहे, असे त्यांनी सांगितले.

16 जागांसाठी निवडणूक

काटेवाडीत 16 जागांसाठी मतदानाला होत आहे. गावात एकूण 5000 जण मतदानाचा हक्क बजावणार आहे. मतदानाला सुरुवात झाली आहे. सकाळपासून मतदान केंद्रावर मतदानासाठी मोठी गर्दी झाली आहे. यंदा अजित पवार यांच्या पॅनलसमोर भाजपने आव्हान उभे केले आहे. आता त्यात कोण बाजी मारणार? हे सोमवारीच स्पष्ट होणार आहे. सरपंचपदासाठी दोन्ही पक्षाच्या पॅनलमध्ये थेट निवडणूक होत आहे.