पुणेकरांसाठी महत्त्वाची बातमी! पुण्यातील तब्बल 60 CNG पंप आज बंद राहणार, कारण…
नेहमीप्रमाणे सीएनजी भरायला पंपावर जाल, पण आजचा दिवस नेहमीसारखा नसेल! कारण आज पुण्यातली 60 सीएनजी पंप बंद राहणार आहेत.
अश्विनी सातव डोके, TV9 मराठी, पुणे : पुण्यात सीएनजीवर (Pune CNG pump Strike) चालणाऱ्या वाहनांना आज मनस्तापाला सामोरं जावं लागण्याची दाट शक्यता आहे. कारण पुण्यातील तब्बल 60 सीएनजी पंप आज एक दिवसासाठी बंद (Pune CNG Closed Today News) राहणार आहे. या सीएनजी पंपधारकांनी एक दिवसाचा लाक्षणिक संप पुकारला आहे. डीएलरच्या कमिशनमध्ये वाढ करण्यात न आल्यानं पुण्यातील पंपचालकांनी निषेध म्हणून संप (Pune Strike) पुकारलाय.
पेट्रोल डीलर असोसिएसनच्या वतीने हा एक दिवसाचा संप पुकारण्यात आलाय. त्यामुळे पुण्यातील अन्य सीएनजी पंपांवर वाहनांच्या मोठ्या रांगा लागून अनेकांचा खोळंबा होण्याची शक्यताय. पुण्यातील टोरेंट सीएनजी स्टेशन आज एक दिवसासाठी बंद राहतील, असा इशारा ऑल इंडिया पेट्रोल डीलर्स असोसिएशनच्या वतीने देण्यात आला होता. डीलर कमिशनमध्ये वाढ करावी, अशी या असोसिएशनची प्रमुख मागणी आहे.
सात दिवस आधीच कमिशनमध्ये वाढ करण्यात यावी, या मागणीचं पत्र देण्यात आलं होतं. मात्र ही मागणी काही मान्य करण्यात आली नाही. त्यामुळे अखेर टोरेंट सीएनजी स्टेशन असलेले सर्व सीएनजी पंप आज एक दिवसासाठी बंद ठेवण्यात येणार आहे.
पाहा व्हिडीओ :
आजच्या संपामध्ये एकूण 60 सीएनजी पंप सहभागी झाल्याची माहिती मिळतेय. याचा फटका इतर पंपांवर जाणवण्याची दाट शक्यता आहे. पुण्यात सीएनजीचा वापर मोठ्या प्रमाणात केला जातो. पुण्यात सीएनजीवर वाहनं चालवण्याचं प्रमाण लक्षणीय आहे. अशावेळी एक दिवसाच्या संपाचा फटका अनेकांना बसणार आहे.
दरम्यान, टोरेंट सीएनजी पंप जरी एक दिवसासाठी बंद असले, तरी दुसरीकडे पेट्रोल आणि डिझेल पंप सुरुच राहणार आहेत. त्यामुळे वाहन चालकांना एक दिवस पेट्रोल-डिझेलच्या पर्यायवर वेळ मारुन नेता येऊ शकेल. पेट्रोल, डिझेलच्या पंपाचा एक दिवसाच्या सीएनजी संपाशी कोणताही थेट संबंध नसल्यानं पुणेकरांना दिलासा मिळालाय.
दरम्यान, ज्या सीएनजी पंपावर एमएनजीएलकडून पुरवठा केला जातो, ते सीएनजी पंप सुरुच राहणार आहेत. त्यामुळे ज्यांनी सीएनजीवरच गाडी चालवायची आहे, त्यांना आणकी एक पर्यायही खुला असणार आहे.