भूमी अधीग्रहण कायद्याला विरोध करणारे पवार आता कुठे आहेत? राजू शेट्टींचा सवाल, तर आजच्या निकालाबाबत म्हणतात…
भूमी अधीग्रहण कायद्याला विरोध करणारे शरद पवार आज कुठे आहेत ? राज्य सरकारने दोन कायदे केलेत त्याला आमचा विरोध आहे, असेही राजू शेट्टी यांनी स्पष्ट केले आहे आणि शरद पवारांना भेटून मी जाब विचारणार असा इशाराही राजू शेट्टी यांनी दिला आहे.
गेल्या काही दिवसांपासून शेतकरी नेते राजू शेट्टी सतत महाविकास आघाडी (Mahavikas Aghadi) सरकारवर टीका करत आहेत. शेतकऱ्यांच्या प्रश्नांसाठी नेहमी मैदानात असणारे राजू शेट्टी (Raju Shetty) केंद्र सरकारवरही तोफा डागत असतात. आता तर राजू शेट्टींनी थेट शरद पवारांवर (Sharad pawar) घणाघाती टीका केली आहे. शरद पवार पावसात भिजले त्यानंतर ढेकळं विरघळावी तसे विरघळून जाऊन शेतकऱ्यांनी मतं दिली, राष्ट्रवादी काँग्रेस, काँग्रेस, शिवसेनेला घेऊन सरकार स्थानप झालं मात्र शेतकऱ्यांची काम झाली नाही, असा आरोप राजू शेट्टी यांनी केला आहे. तसेच भूमी अधीग्रहण कायद्याला विरोध करणारे शरद पवार आज कुठे आहेत ? राज्य सरकारने दोन कायदे केलेत त्याला आमचा विरोध आहे, असेही राजू शेट्टी यांनी स्पष्ट केले आहे आणि शरद पवारांना भेटून मी जाब विचारणार असा इशाराही राजू शेट्टी यांनी दिला आहे.
महाविकास आघाडीने हुरळून जायचे कारण नाही
स्थानिक स्वराज्य संस्थेत राज्यात ज्यांचं सरकार असतं त्यांचे लोक विजयी होतात, त्यामुळे महाविकास आघाडीच्या नेत्यांनी हुरळून जायचे कारण नाही, तिजोरीच्या चाव्या त्यांच्याकडे आहे म्हणून हे लोक त्यांच्याकडे गेलेत, असा टोला राजू शेट्टी यांनी लगावला आहे. यावरुन राज्याचं सार्वमत सांगता येणार नाही, महाविकास आघाडीने त्यांचा कारभार सुधारला नाही तर त्यांना धोक्याची घंटा निश्चित आहे, असे सूचक विधान राजू शेट्टी यांनी केले आहे.
रोहित पाटलांच्या विजयाबाबत काय म्हणाले?
दिवंगत नेते आर. आर. पाटील यांचे सुपुत्र रोहित पाटील यांनी भाजपसह इतर राजकीय पक्षांना धोबीपछाड देत मोठा विजय प्राप्त केला आहे, यावर बोलताना राजू शेट्टी म्हणाले की, रोहितचे अभिनंदन, सगळे विरोधात असताना रोहित लढला. इतर भागातील तरुणांनी पण रोहितचा आदर्श घ्यावा, प्रस्थापितांना आपण धक्का देऊ शकतो, ती ताकद , क्षमता आपल्यात आहे हे लक्षात घ्यावं, अशी प्रतिक्रिया रोहित पाटलांच्या विजयावर त्यांनी दिली आहे.
