29 वर्षे वेदना सहन केल्या, पण आता…; मुरलीधर मोहोळ रुग्णालयात, नेमकं काय घडलं?

Murlidhar Mohol Leg Surgery

पुण्याचे खासदार आणि केंद्रीय नागरी विमानवाहू व सहकार राज्यमंत्री मुरलीधर मोहोळ यांना पुण्यातील एका रुग्णालयात उपचारासाठी दाखल करण्यात आले आहे. पुण्यातील एका खासगी रुग्णालयात त्यांच्या पायाची यशस्वी शस्त्रक्रिया करण्यात आली आहे. तब्बल २९ वर्षांपूर्वी कुस्तीच्या आखाड्यात झालेली जुनी दुखापत पुन्हा बळावल्यामुळे डॉक्टरांच्या सल्ल्यानुसार ही शस्त्रक्रिया पार पडली. या शस्त्रक्रियेनंतर मुरलीधर मोहोळ यांना आता किमान एक महिना सक्तीची विश्रांती घ्यावी लागणार आहे.

२९ वर्षांपूर्वी कुस्ती सोडण्याचे ठरले होते कारण

राजकारणात सक्रिय होण्यापूर्वी मुरलीधर मोहोळ हे एक निष्णात कुस्तीगीर होते. २९ वर्षांपूर्वी कोल्हापूर येथे कुस्ती खेळताना त्यांच्या पायाला गंभीर दुखापत झाली होती. या एका दुखापतीमुळे त्यांचे कुस्तीचे स्वप्न अर्धवट राहिले. त्यामुळे त्यांना कुस्ती कायमची सोडावी लागली होती. इतकी वर्षे त्यांनी या वेदनांकडे दुर्लक्ष केले होते. मात्र गेल्या काही दिवसांपासून हा त्रास प्रचंड वाढला होता. अखेर वैद्यकीय तपासणीनंतर डॉक्टरांनी त्यांच्या पायावर तातडीने शस्त्रक्रिया करण्याचा निर्णय घेतला.

सोशल मीडिया पोस्टद्वारे व्यक्त केल्या भावना

या शस्त्रक्रियेनंतर मुरलीधर मोहोळ यांनी सोशल मीडियावर एक भावनिक पोस्ट शेअर केली आहे. क्षमस्व… पण एक महिन्याची सक्तीची विश्रांती! २९ वर्षांपूर्वी कोल्हापूरला कुस्ती खेळताना झालेली दुखापत आता असह्य होऊ लागली होती. संसदेचे अधिवेशन सुरू असताना आणि महाराष्ट्र केसरी कुस्ती स्पर्धा तोंडावर असताना ही शस्त्रक्रिया करावी लागली, याचे शल्य आहे. कामाचा व्याप आणि लोकांचा संपर्क सुटत असल्याचा त्रास दुखापतीपेक्षा जास्त होतोय. पण तुमच्या शुभेच्छांच्या जोरावर मी लवकरच बरा होऊन पुन्हा जनसेवेत हजर होईन, असे मुरलीधर मोहोळ यांनी म्हटले.

या शस्त्रक्रियेनंतर मुरलीधर मोहोळ यांची प्रकृती स्थिर असून त्यांना डिस्चार्ज देण्यात आला आहे. मात्र तरी डॉक्टरांनी त्यांना हालचाल कमी करण्याचा आणि पूर्ण विश्रांती घेण्याचा सल्ला दिला आहे. त्यामुळे पुढील एक महिना त्यांचे दिल्लीतील अधिवेशन दौरे, पुणे लोकसभा मतदारसंघातील कार्यक्रम आणि महाराष्ट्र केसरी कुस्ती स्पर्धेतील उपस्थिती यावर मर्यादा येणार आहेत, अशीही माहिती त्यांनी दिली आहे.