Sharad Pawar : आज मुख्यमंत्र्यांची सभा, त्याआधी विधानसभा पोटनिवडणुकीत शरद पवार यांच्या पक्षाला बसू शकतो मोठा धक्का
Sharad Pawar : आज मुख्यमंत्री देवेंद्र फडणवीस यांची राहुरी येथे विधानसभा पोटनिवडणुकीच्या प्रचारार्थ सभा होणार आहे. त्याआधी ही निवडणूक लढवणाऱ्या शरद पवार यांच्या पक्षाला धक्का बसू शकतो. एका नेत्याच्या भूमिकेकडे सगळ्यांचच लक्ष लागलं आहे.
महाराष्ट्रात सध्या विधानसभेच्या दोन पोटनिवडणुका लागल्या आहेत. एका बारामती विधानसभा आणि दुसरी राहुरी विधानसभा. अजित पवार यांचं विमान अपघातात अकाली निधन झालं. त्यामुळे बारामती विधानसभेची पोटनिवडणूक होत आहे. यात राष्ट्रवादी काँग्रेस आणि महायुतीच्या सुनेत्रा पवार उमेदवार आहेत. त्यांच्यासमोर फार मोठं आव्हान नाहीय. कारण महाराष्ट्रातील प्रमुख राजकीय पक्षांनी उमेदवार दिलेला नाही. त्यामुळे त्यांचा विजय सहज आहे. पण राहुरीत अशी स्थिती नाहीय. आमदार शिवाजीराव कार्डिले यांच्या निधनामुळे ही पोटनिवडणूक लागली आहे. भाजपने राहुरीमध्ये शिवाजीराव कार्डिले यांचे सुपूत्र अक्षय कार्डिले यांना उमेदवारी दिली आहे. आज मुख्यमंत्र्यांची अक्षय कार्डिले यांच्या प्रचारार्थ सभा होत आहे. या निवडणुकीत प्राजक्त तनपुरे यांच्या भूमिकेकडे सगळ्यांचं लक्ष लागलं आहे.
शरद पवार गटाकडून प्राजक्त तनपुरे निवडणुकीच्या रिंगणात उतरणार अशी शक्यता होती. पण प्राजक्त तनपुरे यांनी ही पोट निवडणूक लढवू नये अशी मुख्यमंत्री देवेंद्र फडणवीस आणि रवींद्र चव्हाण यांची इच्छा होती. त्यानुसार प्राजक्त तनपुरे यांनी उमेदवारी अर्ज दाखल केला नाही. त्यामुळे शरद पवार यांनी राहुरीमधून गोविंद मोकाटे यांना उमेदवारी दिली. आता प्राजक्त तनपुरे अक्षय कार्डिले यांना पाठिंबा देणार का? ते आज मुख्यमंत्र्यांच्या उपस्थितीत भाजपत प्रवेश करणार का? या सगळ्या प्रश्नांची उत्तर आज मिळतील. राष्ट्रवादी शरद पवार पक्षाचे माजी मंत्री प्राजक्त तनपुरे थोड्याच वेळात कार्यकर्त्यांची बैठक घेणार आहेत.
आतापर्यंतची भूमिका भाजपला अनुकूल
कार्यकर्त्यांशी चर्चा करून भूमिका जाहीर करणार आहेत. राहुरी पोटनिवडणुकीसाठी प्राजक्त तनपुरे नेमकी कुणाला पाठींबा देणार याकडे सर्वांचं लक्ष आहे. मतदारसंघातील निवडक कार्यकर्त्यांसोबत साधणार संवाद. प्राजक्त तनपुरे यांच्या भूमिकेमुळे कार्यकर्ते संभ्रमात अशी स्थिती आहे. प्राजक्त तनपुरे यांची या निवडणुकीतील भूमिका पाहिली, तर ती भाजपला अनुकूल राहिली आहे. त्यांनी आज अक्षय कार्डिले यांना पाठिंबा दिला किंवा भाजपत प्रवेश केला, तर तो शरद पवार यांच्यासाठी मोठा धक्का असेल. प्राजक्त तनपुरे यांनी मंत्रीपद भूषवलेलं आहे. राहुरी तालुक्यातील नगरपालिका, बाजार समिती, साखर कारखाना अशा प्रमुख संस्थांवर प्राजक्त तनपुरे यांचं वर्चस्व आहे. तनपुरे कुटुंबाला राहुरीमध्ये मान,सन्मान आहे.
