घराबाहेर लटकवलेली बकरी, कापलेले अंगठे, अजित पवारांच्या निधनापूर्वी घराबाहेर काय काय सापडलं?

राष्ट्रवादी काँग्रेसचे सर्वेसर्वा अजित पवारांचे एका विमान अपघातात निधन झाले. त्यांच्या निधनाला आज तीन महिने उलटले आहेत. मात्र अद्याप कोणतीही ठोस कारवाई करण्यात आलेली नाही. आता याच पार्श्वभूमीवर रोहित पवार यांनी आज पुण्यातील सीआयडी (CID) कार्यालयात हजेरी लावली. यावेळी त्यांनी तपास यंत्रणेच्या कामावर तीव्र नाराजी व्यक्त करत सत्ताधारी आणि अजित पवार गटाशी संबंधित एका छोट्या नेत्यावर गंभीर आरोप केले आहेत. यावेळी त्यांनी अजित पवारांच्या बारामती आणि मुंबईतील देवगिरी बंगल्याबाहेर झालेल्या कथित पूजा, काय काय आढळले, याबद्दलची माहिती दिली. यामुळे राजकीय वर्तुळात मोठी खळबळ उडाली आहे.

पुढच्या वेळी मला वॉचमनशीच संवाद साधावा लागेल

सीआयडी कार्यालयातून बाहेर पडल्यानंतर माध्यमांशी संवाद साधताना रोहित पवार म्हणाले की, “मी तिसऱ्यांदा सीआयडी कार्यालयात आलो आहे, पण एकही जबाबदार अधिकारी तिथे उपस्थित नाही. मला तिथे असलेल्या रिकाम्या खुर्च्यांचे फोटो काढावे लागले. सरकार आणि तपास यंत्रणा या प्रकरणाला गांभीर्याने घेत नसल्याचेच हे लक्षण आहे. पुढच्या वेळी मला वॉचमनशीच संवाद साधावा लागेल.”

अशोक खरात आणि आर्थिक उलाढाल

रोहित पवार यांनी भोंदू बाबा अशोक खरातच्या नावाचा उल्लेख यावेळी केला. या अँगलने तपास करावा, अशी मागणी केली. २७, २८ आणि २९ जानेवारी रोजी अशोक खरातच्या बँक खात्यात अचानक मोठी आर्थिक उलाढाल का झाली? बारामतीमधील एक छोटा राजकीय नेता सातत्याने खरातच्या संपर्कात होता. या नेत्याचे इतर मोठ्या नेत्यांशी आर्थिक संबंध असून, त्यानेच ही सर्व रॅकेट चालवली असल्याचा संशय आहे,” असे रोहित पवार यांनी नमूद केले.

काटेवाडी आणि देवगिरीबाहेर पूजा?

सर्वात धक्कादायक बाब म्हणजे उपमुख्यमंत्री अजित पवार यांच्या निधनापूर्वी काटेवाडीतील घराजवळ, बारामतीमधील निवासस्थानी आणि मुंबईतील देवगिरी बंगल्याबाहेर विचित्र पूजा करण्यात आल्या होत्या. काटेवाडीत एका विहिरीशेजारील झाडाला बकरीची पूजा करून टांगण्यात आले होते, तिथे आता फक्त हाडे आणि मांस उरले आहे, असे रोहित पवार म्हणाले.

आम्ही काळ्या जादूवर किंवा भोंदूगिरीवर विश्वास ठेवत नाही, पण या कृत्यांमागचा नेमका उद्देश काय होता? खरातने एका शेतकऱ्याला सांगितले होते की, पवार कुटुंबावर लवकरच मोठा आघात किंवा अडचण येऊ शकते. हे सर्व राजकीय षडयंत्राचा भाग आहे का, याची चौकशी होणे गरजेचे आहे.

यावेळी रोहित पवारांनी अजित पवार गटातील नेत्यांवर टोला लगावला. अजित दादांच्या मोठ्या नेत्यांच्या करंगळ्या आणि अंगठे कापले होते, आता या छोट्या नेत्याचे काही कापले आहे का, याचा शोध आम्ही घेत आहोत. या सर्व प्रकरणातील सीडीआर (CDR) माहिती डाऊनलोड झाली असून, त्यातून अनेक मोठे खुलासे होण्याची शक्यता रोहित पवार यांनी वर्तवली आहे.